Gorkha-te'n Bhanu Jayanti an hmang

Mizoram Gorkha Youth Association (Central) huaihawtin Gorkha-te chuan thu leh hla lama an puipa bera an ngaih Adikavi Bhanubhakta Acharya pian champha vawi 209-na, Bhanu Jayanti chu nimin khan Vanapa Hall-ah an hmang a, MGYA hruaitu hlui Sher Singh Thapa khuallian a ni. Kolasib leh hmun dangahte an hmang bawk.

Vanapa Hall-a Bhanu Jayanti lawmnaah hian Adikavi Bhanubhakta Acharya thuziah hrang hrang chhiar chhuah a ni a; Gorkha hnam làm chi hrang hrang entir a nih bakah, zirlai ti ṭhate chawimawina hun hman a ni.

Bhanu Jayanti pual hian chawlhkar liam taah khan Nepali Middle School, Khatlaah Adikavi Bhanubhakta hun hman a lo ni tawh a; Acharya thu leh hlate zirho a nih bakah, naupangte tan essay ziah, lemziak leh quiz intihsiak an buatsaih.

Adikavi Bhanubhakta Acharya hi Nepal ram Tanahu district-a Chundi Ramgha khuaah kum 1814 khan a piang a; thu leh hla lamah sûlhnu tam tak a nei a, mipuiin an hriat lârna ber chu Hindu lehkhabu thianghlim Ramayana, Sanskrit aṭanga Nepali ṭawnga a lehlin vang a ni.

MGYA hi kum 1976 khan din niin, Mizorama Gorkha pawl lian ber a ni a, Aizawlah branch 12 leh Aizawl páwn lamah sub-headquarter pakhat (Kolasib) leh branch panga an nei a, member 4,500 vel an awm mek.