Kuhva chíngtute harsatna Union Minister hnenah thlen

YMA, Taitesena Group leh Hachhek Bial Kuhva Chingtu Pawl (HBKCP) chuan kuhva tám hri (Yellow Leaf Disease) vangin harsatna an tawh thu Union Agriculture and Farmer's Welfare minister of state Sobha Karandlaje hnenah an thlen.

Taitesena Group YMA leh HBKCP-te hian kuhvaa harsatna an tawh chungchang Mizorama rawn zin Sobha Karandlaje hnenah June 12, 2023 khan an thlen a; an harsatna tawh zir chiang tur mithiam tír a, ṭanpuina awm theite ngaihtuahsak turin an ngen.

Sobha Karandlaje chuan, a awmna Karnataka-ah pawh kuhva tám hri vangin harsatna an tawh nasat tawh thu sawiin, Mizorama loneitute'n an tuar ve chu pawi a tih thu a sawi a; bawrhsap leh a kaihhnawih department-te'n zir chiangin, sorkar laipuiah thlen se, theihtawp a chhuahpui tur thu a sawi a ni.