SYS Minister-in hna thawhte a enfiah

Sports & Youth Services minister Robert Romawia Royte chuan nimin khan Lungleia infiamna ruhrel siam mekte a tlawh kual a; July 12, Nilaini khan Lawngtlaia infiamna ruhrel siam mekte a enfiah bawk.

Minister chuan, C Ṭhuamluaia Mualah zana inkhelh theihna turin flood light dah a nih dawn thu sawiin, "Cheng nuai 700 séngin dah tum a ni. Cheng nuai 1,800 sengin moto sports racing tract siam tum a ni bawk," a ti. Minister hi MLA Lawmawma Tochhawng leh Dr K Pachhunga te, MSSC secretary John Ṭanpuia leh MJA member-te'n an ṭawiawm a ni.

SYS Minister hian Zobawka Sport Academy sak mek a tlawh a, hna thawh tur 80% vel zawh ni tawhin, cheng nuai 3,430.98 senga siam zawh theih tura ruahman a ni. Sport Academy din mek hi National Green Tribunal-in a chawlh lailâwktir mek a ni.

Robert Romawia Royte hian 60% vel thawh zawh tawh Lunglawna community service centre sak mek te, cheng nuai 319.78 sénga sak mek leh 80% vel thawh zawh tawh Ramthar Venga futsal ground siam mek te, cheng nuai 4,913.31 senna tur Rahsi Venga infiamna hmunhma siam mek te, nuai 1,108.7 senna tur Leitlangpui Hockey Ground siam mek te, Electric Venga khelmual siam mek leh Zotlanga Integrated Sport Centre sak mekte a enfiah bawk.

SYS Minister hian July 12, 2023 khan Lawngtlai leh a chhehvela infiamna hmunhman siam mek - Mámpuia Lawngtlai District Sport Complex sak mek te, Lawngtlai Chawnhùa multipurpose community centre sak mek te, College Venga Residential Sport School siam mekte a tlawh.

Mámpuia Lawngtlai District Sport Complex siam nen PMJVK aṭangin cheng nuai 5,019.43 ruahman a ni a, Chawnhùa multipurpose community centre sak nan cheng nuai 236 leh College Venga Residential Sport School sak nen nuai 3,461.7 ruahman a ni.