KHAWTHLIR

Manipur raltlan mi 19-in an pung

Manipur buaina vanga sahimna zawnga Mizorama lut nimin tlai dar 5 thleng khan mi 12,492 an awm a, July 12, Nilaini aiin mi 19-in an pung. Mi 12,492 zinga 2,764 chu relief camp 37-ah an khawsa a, camp-a khawsa hi a hma ni aiin 129-in an tlem zawk. Mi 9,728 chu hmun dangah an awm a, a hma ní aiin 148-in an tam. Manipur ráltlân awm tamna ber district - Kolasib-ah mi 4,425 an awm a, Aizawl district-ah mi 4,219 leh Saitual district-ah mi 2,940 an awm bawk.

Inbuatsaihna endik

Chief electoral officer Madhup Vyas chuan nimin khan Saitual a tlawh a, kumina MLA inthlanpui awm tura inbuatsaih dan a enfiah. CEO chuan, mipuiin zângkhai taka vote an thlak theih a pawimawh tih sawiin, "Vah velna leh venhimnate uluk taka kalpui a nih theih nan theihtawp chhuah ang che u," a ti. Saitual district-ah hian MLA constituency pathum Chalfilh, Ṭawi leh Lengteng biala khaw ṭhenkhat a awm.

Minisrer-in hawng

Minister C Lalrinsanga chuan nimin khan Lunglei College auditorium cum annexe thar a hawng. In hi Special Plan Assistance cheng nuai 472.22 sênga sak a ni. Minister chuan, Mizo hnam ziaráng leh nun hluite ngai hlu a, hun kal zel turah ram leh hnam chawi sangtu ni turin zirlaite a chah.

PS siam rem dan tur ngaihtuah

Mamit District Standing Committee on 2nd Special Summary Revision of Photo Electoral Rolls, 2023 chu an chairman VL Remliana, bawrhsap kaihhruaiin nimin khan DC conference hall-ah an ṭhu khawm a; polling station hming thlak rawtna leh thil dang pawimawhte an ngaihtuah. Voter awmna siam rem ngai mi 2,840 an awm tih tarlan a ni.

EVM Centre hawng

Saitual district election officer Dr Lalngura Tlau, bawrhsap chuan nimin khan DC pisaah mipuite'n electronic voting machine hmanga vote an thlak chhinna tur, EVM Demonstration Centre a hawng. Saitual district khaw hrang hranga EVM hmanga vote thlak chhinna tur mobile demonstration van a vailiam bawk.