AR huam chhunga LSC awm zingah neitu hmuh zawh loh 8 a awm

Aizawl khawpuia Assam Rifles ram, main barrack huam chhunga LSC leh house pass awm, a neitu hmuh zawh si loh pariat a awm.

Vanglaini thu dawn danin, Land Revenue & Settlement (LRS) department chuan tun hnai khan Assam Rifles rama LCS leh house pass neite chu insawifiah tura hriattirna, show cause notice an pe a; chuta ṭang chuan LSC/pass neitu mi pariat an zawng hmu zo lo.

LSC/pass neitu an hmuh zawh loh chungchangah hian LRS department chuan July 7, 2023 khan hriattirna a chhuah a; ni 30 chhunga an ram cancel a nih lohna chhan tur LRD Director hnena thehlut turin an hriattir a ni.

LRS department chuan hriat­tirna an tihchhuahah, Assam Rifles main barrack huam chhung chu The Mizoram (Restriction on Use of Transferred Land) Act, 2002-a tarlan angin Assam Rifles ram luah huam chhung a ni tih an tarlang.

LSC/pass an neihte chu cancel a nih lohna chhan tur sawi tur an nei a nih chuan lehkha tihchhuah aṭanga ni 30 ral hma ngeiin ziaka thehlut turin Revenue depar­tment chuan ram neitute an hriattir a, "Hun tiam chhunga chhanna hmuh a nih loh chuan sawi tur nei loa ngaih an ni ang," an ti.

LRS dept. hian Assam Rifles ram huam chhunga ram neite chu cancel sak tumin hma an la mek a ni.