Buha intodelhna tur ram zau tak a awm - CM

Chief minister Zoramthanga chuan nimin khan CMO conference hall-ah Mission Foundation Movement (MFM) hmalaknaa Reiek RD Block-a Start-up Entrepreneurship Development Programme model project kalpui dan leh hlawhtlinna tarlanna documentary a tlangzarh. CM chuan, "Buha intodelhna tur ram zau tak a awm a, ruahtui dawh khâwl hmangin kumtluanin kan lo leh huante hi ṭangkai taka hman theih a ni," a ti.

Tlangzarhna inkhawm hi minister Lalrinawma'n a kaihruai a; Chief Minister chuan, kutkawih eizawnnaa hmasawnna thlen tura hmalak a pawimawh thu sawiin, "Kut hnathawh hi eizawnna hlawhtling a nih theihzia chiang mah ila, ram pum hmasawnna tur chuan hman aṭanga kan tih tawhte kalsan a ṭul ṭhin," a ti a, buha intodelhna tur ram zau tak sawiin, tumruhna leh dawhtheihna nen bawhzui thiam a pawimawh thu a sawi.

Zoramthanga chuan, a remchanna apianga khawl ṭha hman te, kawng siam belh leh siamṭhat te, sâwngbàwl hmasak phawtte a pawimawh tih sawiin, "Sorkar pawhin hma a la. Sorkarin engkim a vaihma vek tur ni loin, a theih chin chinah privatisation kalpui a ṭha," a ti.

Start up Entrepreneurship Deve-lopment Programme atan hian Ministry of Tribal Affairs chuan kum 2019-2020 chhungin SCA to TSS scheme hnuaiah Social Welfare department kaltlangin cheng nuai 335 a pe a, implementing agency chu MFM a ni.

Mamit district (Aspirational District) chhung, Reiek RD Block-a chhungkaw 300-te'n ṭanpuina an dawng tawh a, ṭanpuina chu suma pe loin, thawh tur an thlan mil bungrua pek a ni. Reiek RD Block-a mi 120-in Rs 45,000 hû bungrua leh mi 180-in Rs 65,000 hû bungrua an dawng.