Kuhva chíngtute police bulah an duty; Dan loa kuhva phur an hmu rih lo

Hachhek Bial Kuhva Chingtu Pawl (HBKCP) rorel bawhzuiin Hachhek biala kuhva chíngtute chu July 12, 2023 aṭang khan Zamuanga police check post-ah an duty ve ṭan a, nimin thleng khan dan loa kuhva tawlh rûk an la hmu lo.

HBKCP hruaitute July 11, 2023 a ṭhukhawm chuan Zamuang police check post-a duty-te thâ tichak tura check post-a duty ve an rél a, an rorel angin July 12 zing dar 9 aṭangin an duty ṭan. Darkar 24 chhung an duty a, Hachhek biala khaw hrang hranga kuhva chíngtute inchhâwkin an duty ṭhin. An duty ṭan aṭangin kuhva rah phur man tur emaw, rinhlelh endik tur emaw an la hmu lo a ni.

HBKCP tarlan danin, thuneitute an ngen angin Zamuang police check post chu kuhva rah tawlh ruk endikna atan siam a ni a, mahse, kuhva chíngtute chuan police-te chu an rin zawh tawh loh avangin duty an indah ve ta a ni. Police duty ṭhin zingah kuhva phurte'n an paltlang theih chhana rinhlelh an nei bawk.

Kum 2021-ah kuhva rah an hralhna aṭangin cheng nuai 3,235 chuang an hmuh lai leh, kum 2022-ah cheng nuai 5,000 chuang hmuh an inbeisei laiin cheng nuai 2,000 chuang an hloh tih tarlangin HBKCP chuan, "Dan phal loh kuhva ro phurtute'n harsatna min siamsak hi tawrh thiam harsa kan ti," an ti.

Zamuang police check gate paltlang loa Tripura lama luhna, Assam lam pan lehna kawng a awm a, chumi veng tur chuan duty an indah tawh bawk.