Heroin kawltu kum 10 táng turin ti

Heroin kawl vanga Excise & Narcotics depart­ment (END)-in an man Bawichungnung (26) s/o Lalremthang, Leisen, Myanmar chu July 13, Ningani khan court-in thiam loh a chantir a, kum 10 chhung jail-a táng tur leh Rs 1,00,000 chawi turin a hrem.

END aṭanga thu dawn danin, Bawichungnung hi heroin a kawl avangin February 25, 2021 tlai dar 3:22 khan Hnahthial district-a Ngharchhip aṭanga km. 13 vela hláa awm Myanmar ramri, Ṭiau lui bulah heroin gram 762 (hawng 63) nen man a ni a; Lungleia END-in NDPS Act, 1985 Section 21(c) tlawh­chhanin thubuai an ziak lut a ni.

Bawichungnung thubuaiah hian Lunglei District Court-a special judge (NDPS Act) F Rohlupuia chuan July 12, 2023 khan thiam loh a chantir hnuah July 13 khan hremna a puang a; rim taka kum 10 chhung táng tur leh Rs 1,00,000 chawi turin a hrem a ni. Pawisa a chawi loh chuan thla 10 dang tàn belh turin a ti bawk.