Aizawlah Y-20 Meet bul ṭan a ni

Sports & Youth Services department leh Mizo Zirlai Pawl Gen.Hqrs chuan nimin khan Vanapa Hall-ah Y-20 Meet on Nationalism, Patriotism & Development khuhhawnna an buatsaih a, chief minister Zoramthanga'n a hmanpui.

Sorkar laipuia Ministry of Youth Affairs & Sports chuan India-in G-20 president nihna a chelh chhunga India rama Youth-20 Programme hman mek chu Mizoramah hman a ni ve dawn a; programme chu ṭhalaite leh zirlaite hnena Mizoram tan, ram leh hnam tana hmasawnna thil pawimawh inzirtirna hun atan SYS leh MZP chuan hma an laho a ni.

Chief Minister chuan, Y-20 Meet thupui zinga pakhat, nationalism - hnam thinlung tih chu hnam humhim duhna aṭanga chhuak a nih thu a sawi a, "Hmasawnna atan hnam rilru put a pawimawh," a ti.

Ram leh hnam rilru put leh hmangaihnain hmasawnna a thlen thei tih sawiin Zoramthanga chuan, Mizoramah harsatna hrang hrang tâwkin sum indaih lohnate awm mah se, hmasawnna nasa zawk a la thleng thei tih hriaa hnam hmangaihna thinlung nen ke pên turin ṭhalaite a sáwm.

SYS minister Robert Romawia Royte pawhin thu sawiin, ram inrêlbàwlna ngaihvena hriat chian leh hnama chian a pawimawh thu a sawi a, "Constitution-a Article 371G hi hnam rilru Mizote'n kan put vanga piang a ni a, Mizo hnam humhimna pawimawh tak, vawiin thlenga a pawimawhna la chiang zel a ni," a ti.

Inkhawm hi SYS director Dr Lalrozama'n a kaihruai a, MZP president Lalnunmawia Pautu pawhin thu a sawi. Y-20 Meet khuhhawnna hi district tinah buatsaih tur a ni.