Party dang tan Mizo nationalism an sawi a rem ve lo - Tawnluia

MNF senior vice president Tawnluia chuan, MNF ni lo, political party dang tan Mizo nationalism sawi a rem ve lo niin a sawi a; Uniform Civil Code chu MNF party-in an duh loh thu leh UCC lakah Mizote humhim an ngaih thu a sawi bawk.

Tawnluia hian nimin khan Mizo Hnam Rûna inkhawmah thu sawiin, "MNF hi Zo hnahthlak zawng zawng tan an homeland ni turin, kan hnam din chhuah nana din a ni. MNF hi Mizo hnam party a ni a, party dang tan Mizo nationalism sawi a rem ve lo, keini chu a neitu kan ni," a ti.

MNF chu Mizo hnam humhim tur leh Zoram rawngbawl tura ding a nih thu sawiin Tawnluia chuan, "Mizo nationalism hi champion-pui kan tum. Party dangte neih ve loh kan Constitution-ah a awm bik a, lalna thuneihna vanga din a ni ve lo a, Pathian leh kan ram tana din a ni," a ti a; MNF member an nihna an chian a pawimawh thu a sawi.

MNF Senior Vice President chuan UCC chu a nihna ang ang hman chi a ni lo tih sawiin, "Article 371G ṭan chhanin hetia hrût rual pawrh chi kan ni lo. Kan dikna kan humhim zel dawn. UCC lakah kan inhumhim a ngai a, kan duh loh thu kan thlen tawh a, kan MP te, kan President leh sorkar ang pawhin kan thlen tawh. UCC hi Mizorama hmang lo turin kan theih chhung chu kan bei zel dawn a ni," a ti.

Tawnluia chuan, "Kan constitution-ah kan ram huam chinin a huam ram leilungte ram rorelna pakhat hnuaia inzawm khawm hi kan party-in a tum bul ber leh Mizote sakhua humhim a ni. Chu chu India Article 371G-ah chiang takin a inziak," a ti a; Article 371G chu humhim turin engti kawng zawng pawhin a tàwp thlenga an beih tur thu a sawi.

MNF Sr Vice President chuan, party dang candidate leh campaign-a an thusawi zinga 80% chu sorkar sawiselna a nia sawiin, "Hetianga mi dangte sawisel leh sâwtna tam lutuk hi mipui hian an hne tawh," a ti a; "Pu Zoramthanga sorkar lo hi chu sorkar leh tur an awm lo e, tih hi mi pangngai chhût dan a ni," a ti bawk.