HIV, ruihhlo, eirûkna leh thluaka sum lut natnate politics hmanga do a ngai - Sawta

Congress party president Lalsawta chuan, Uniform Civil Code (UCC) leh sakhaw zalenna duh lotute do turin Kristiante an ṭan rual a ngaih thu leh HIV, ruihhlo, eirukna leh thluaka sum lut natnate chu politics hmanga do lêt a ngaih thu a sawi.

Nimina Lal Thanhawla Audi-torium-a inkhawmah thu sawiin Lalsawta chuan, "Kan ramah HIV, ruihhlo, eirûkna leh thluaka sum lut natna a hluar hle. Ràl aṭangin heng hi a thlirtu kan ni thei lo. Politics hmanga do lêt a ngai. Mi ṭha lote hnuaia kan kûn lohna turin mi ṭhate lo chhuak u la, keini leh chhuan lo la awm zel turte tan ram ṭha zawk i din ang u," a ti.

MPCC President chuan, sakhaw zalenna dodalna thlipuiin India ram a rún mek nia sawiin, "Manipur-ah kan unaute'n nasa takin an tuar mek. Sakhaw zalenna dotute’n kan ramah bu an khuar tawh. Hei hi Kristian leh Hindu sakhua indona a ni. UCC leh sakhaw zalenna duh lotute do tur hian keini Kristiante hi kan ṭan rual a ngai," a ti a; Mizo hnam lungphûm a nghîng mek nia sawiin, dopui turin kohhran, pawl leh political party a sáwm.

Mizoram mipuiin nasa taka Citizenship Amendment Bill an do laiin MNF-te'n an ‘amen’ nia sawiin Lalsawta chuan, "An kutah an intulût a, kan hnam leh kan sakhua dinhmun him loah an dah. Kumin 2023 inthlan hian kan hnam leh kan sakhua a him leh him loh a hril dawn," a ti.

Congress President chuan, Congress party zawm tharte chu sorkar ṭha siam turin lut an nia sawiin, "An tum ram an pan tur hi Congress party chuan kan hlen chhuahsak dawn. Congress party hi ram siam ṭhatna inpui a ni," a ti a; an beisei ram ṭha zawk an thlenpui dawn niin a sawi.

Lal Thanhawla Auditorium-a inkhawmah hian Congress party zawm thar mi 170 chu Lalsawta'n a lawm lut niin MPCC thuchhuah chuan a tarlang.