Inlungrual lo anga min sawitute hian min awt - ZPM Chief Organiser

ZPM party chuan nimin khan an pisaah political session an hmang. ZPM chief organiser RL Liantluanga'n thu sawiin, "Kan inpumkhatna ṭhatzia party chhunga awmte'n kan hre chiang a, party dang leh páwn lam aṭanga min beitute dâwt phuahchawp vangin kan nghîng lo. Inlungrual lo anga min sawitu party-te hian min awt em em a ni," a ti.

ZPM Chief Organiser chuan, mipuiin ZPM sorkar hun an nghakhlel nia sawiin, "Bial tinah an rawn lut sup sup mek... Pathian leh mipui zarah kalphung thar, mipui sorkar kan siam ngei ang. Sorkarna siam tawh party pahnihte'n eirûkna an do tak tak lohzia hre chiangtu kan ni a, ZPM-in sorkarna kan siam a nih chuan mipui chan ái eirûk hmangte tan hmun a awm dawn lo," a ti. Bial vil tur an puan hma a ṭhatzia an la hriat zel dawn thu leh ZPM sorkarah ṭhalaite tan hna ṭau a ṭeh dawn thu a sawi bawk.