Lungleiah Yuva Utsav Youth Festival

Nehru Yuva Kendra (NYK) chuan nimin khan Lunglei Kawmzawla HATIM conference hall-ah Yuva Utsav Lunglei District Youth Fes-tival an buatsaih a, Mizoram Youth Commission chairman Dr Vanlalṭanpuia, MLA-in a hawng.

Yuva Utsav-ah hian thupui chu ‘Panch pran’ tih a ni a; India ram chu ram hmasawn zawk, saltànna rilru aṭanga zalenna siam te, hnam ziaráng leh hlutna chawisan te, inpumkhatna leh ram leh hnam tana inpekna thinlung pu tura ṭan lakte chu a thu ken pawimawhte a ni.

Declamation contest, cultural programme, exhibition leh food stall-te buatsaih a ni a; Yuva Utsav puala zirlaite tan intihsiakna chi hrang hranga ti ṭhate hnenah lawmman sem a ni bawk.

Dr Vanlalṭanpuia chuan, India ramah hna thawk thei ṭhalai an tam avangin hman thiam a ngai tih sawiin, "Inelna ṭha hmachhawn turin kan inbuatsaih a ngai. India rama zirna kalphung danglam zel hi zirlaite'n kan luhchilh thiam chuan hma lam hun atan kawng zau tak a inhawng tih kan hriat a ngai," a ti a, thawhrimna a pawimawh thu a sawi.

Inkhawmah hian Lunglei additional DC Donny Lalruat-sanga, NYK deputy director Mercy Sellate leh HATIM principal Vuansanga Vanchhawng te pawhin thu an sawi a ni.