MCC-in zirlai ti ṭhate an lawmpui

Mizoram Christian College (MCC) chuan nimin khan Vaivakawna YMA Auditorium-ah zirlai tharte lawmna leh zirlai ti ṭhate lawmpuina, Fresher's Social cum Felicitation an hmang a, Higher & Technical Education director Sangchhin Chinzah-in a hmanpui.

Inkhawm hi assistant professor T Lalremruata leh Lalawmpuii Khiangte ten an kaihruai a; Sangchhin Chinzah chuan, zirlaite chu mahni mihringpuite zahna leh mi dang bula khawsak thiamna lamah inzir turin a fuih a; exam-naa entawn, eirûkna leh ruih theih thil laka fihlim turin a chah bawk.

MCC principal Dr Tawnenga chuan, MCC zirlai tharte chu chhawr tlâk leh mi puitling an nihna tur zirlaiin a hmuah thu sawiin, zâm loa chona hmachhawn turin a fuih a, an kiangah an zirtirtute an awm reng dawn thu a sawi.

MCC assistant professor Dr Lalbiakdiki kaihhruaiin zirlai ti ṭhate lawmpuina hun hman a ni a; zirtirtute aiawhin assistant professor Dr Gloria Laldinmawii Saoli-in thu sawiin, MCC-in Mizoram University hnuaia under graduate final year exam an hmachhawn hmasa berah rank holder paruk lai an neih thu a sawi a ni.