KHAWTHLIR

Sikul thar hawng

Assembly deputy speaker H Biakzaua chuan nimin khan Sangau Higher Secondary School (Samagra) arts stream building sak thar a hawng. Sikul hi cheng nuai 117 hmanga sak a ni a, chhâwng thum, a dung ft. 73 leh a vâng ft 22.5-a zau a ni. H Biakzaua chuan, "Zirna tel loin hmasawnna a thleng thei lo. Thil tihna kawng tinréngah thiamna bik tak neih a pawimawh hle a, thiamna rin tlak leh chhawr tlak neih a pawimawh tak zet a ni," a ti.

Thuthlung ziak

Labour, Employment, Skill Development & Entrepreneurship (LESDE) department leh Tharthilthlentu - Entrepreneurship & MSME Support (TiLi) chuan nimin khan LESDE conference hall-ah Mizorama kutkawih eizawnna leh bulṭanna tihhmasawn leh tihchangtlun nan thawh dunna thuthlung an ziak. Thuthlung hi kum khat atan a ni a; LESDE secretary Lalramsanga Sailo leh TiLi chairman LTL Fela ten hming an ziak a ni.

Inthlan tur thlirho

Lunglei District Standing Committee on Rationalization of Polling Stations chu nimin khan an chiarman Ramdinliana, bawrhsap hoin DC conference hall-ah an ṭhu a; MLA inthlanpui neih tura inpuahchah dan an thlir bakah, polling station siam belh leh siam rem ngaite an sawiho. Lunglei district-ah hian MLA bial pasarih - South Tuipui, Lunglei East, Lunglei North, Lunglei South, Lunglei West, Thorang leh West Tuipui te a awm.

Inhriattirna buatsaih

Telecom Regulatory Authority of India Regional Office, Kolkata chuan July 13, Ningani khan Aijal Club-ah inbiakpawhna leh a kaihhnawih hmangtute dikna leh chanvo humhim dan leh hmalakna inhriattirna an buatsaih.

Kawng khâr dawn

Vawiin aṭanga July 17, Thawhṭanni thlengin PWD-in Secretariat building septic tank an siamṭha dawn a, hei vang hian Secretariat building thlanga KVI leh MIZOFED pisa inkar kawng (ATI chhak) khâr a ni dawn tih Traffic SP-in a puang.

Mei zu mi 4 man

Aizawl District Anti Tobacco Squad leh GAD hnuaia Tobacco Control Team chuan nimin khan Secretariat building chhungah dan bawhchhiaa mei zu an awm leh awm loh an endik a, phal lohna hmuna mei zu mi pali manin, pawisa an chawitir. Secretariat-ah hian Tobacco Control Team din a ni a, chak zawka hmalak an tum tih an tarlang.