Inter Miami-in Lionel Messi an lalut ta

Paris Saint Germain-ah contract thar a ziak dawn lo tih a chian kha chuan, mi tam takin a kalna tur lam an inzawt a, Saudi Pro League club Al-Hilal-in kum hnih chhunga dollar tluklehdingawn 1.6 hlawh tura an sawmnate kha turu tak a ni!

Barcelona hming pawh lam rik zingah a tel a, amah Messi ngei pawhin European club zingah sawmtu a neih thu a sawi. Mahse, Barca-in Messi lalut turin an sum dinhmun an chingfel hman lo a, Argentine forward hian Europe-ah chuan Barca tih loh club dang tana khelh a tum tawh lo bawk.

Messi leh Miami

Hetiang boruak karah hian hming lam rik ve reng pakhat an awm a, chu chu Inter Miami a ni - mahse, David Beckham-a club hi Messi meuh lalut turin an lian tawk em, tih zawhna a awm a, a chhanna erawh kan beisei aia hmaa pek kan ni.

Season tharah Messi-a'n Inter Miami tan a khel dawn a, Miami chuan Inrinni khan World Cup-a Argentina champion puitu Messi an lakluh thu an tichiang. Kum 2025 thleng daih contract an ziahpui.

Tukin zing dar 5:30 bawr velah Messi hi DRV Pink Stadium-ah Inter Miami player a nihna angin phochhuah a ni a, khawvelin Miami lam a hawi ang.
Messi chuan, "United States-a Inter Miami tana ka khel tur hi ka phur. Ka chenna hmun thara inbengbel a, club nena kan hmachhawp tih hlawhtlin ngei ka tum ang," tiin video kaltlangin a phur tawh thu a sawi.

Messi & contract

Kum 36 mi Messi hian kum hnih leh a chanve chhung khel turin Miami club-ah hian contract a ziak a, a ṭul dan a zira kum khat dang pawhsei theih tur a ni - kum 2025 thleng khel turin contract a nei a, 2026 thleng pawh a cham thei, tihna a nih chu.

Messi hian eng tikah nge Miami tan a match hmasa ber a khelh ang, tih chu zawhna langsar a ni a, he thu buatsaih a nih lai hi chuan a chhanna pek a harsa - MLS leh Mexico top flight league Liga MX club zawng zawngin an khelh tura duan, tournament thar Leagues Cup-ah Messi hi Miami tan a inlan hmasa ber mai thei.

Leagues Cup-a a match hmasa berah Miami hian Cruz Azul an hmachhawn dawn a, July 21-ah an intawng dawn. Chuti a nih chuan Messi hian Miami tana a match hmasa berah Mexican club hi a hmachhawn mai thei.

Cruz Azul hi a hmachhawn lo a nih chuan, August 21 zinga Charlotte nena an league match khelh tur hi Inter Miami tana Messi match hmasa ber a ni thei - MLS hi keini lam sanaah chuan zing lamah hlir an khel ṭhin.

Number 10

Messi hian PSG-ah khan number 30 a ha ṭhin a, Barca-a a career ṭantirah he number hi ha ṭhin mah se Messi ṭantu tam tak chuan an hrethiam lo - an player ngaihsan hi number 10 nen inhmeh bik ngawih ngawihah an ngai tlat.

Argentina captain hian Barcelona-ah number 10 chu tuma tih ve theih loh tur khawpa ropuiin a hlawhtlinpui a, an ram tan number 10 a ha bawk - he number nen hian Copa America leh World Cup nomawi a chawi tawh.

Hei vang hian Messi ṭantute cuan Miami-ah hian number 10 ha leh ngei turin Messi an beisei a, Barca forward hlui hian jersey la pawt parh chiah lo mah se number 10 a hak ngei rin a ni. Miami hian Messi lakluh theih beiseiin number 10 hi an lo dah awl rih char char niin an sawi.

Club naupang tak Miami tan hian Argentina tana Messi khelhpui ṭhin Gonzalo Higuain chuan kum 2022 khan jersey number 10 hi a ha a, Mexican player Rodolfo Pizarro chuan kum 2021 leh 2020 khan a ha tawh bawk.

All Star!

USA-ah hian tihdan phunga neih, an ngaihsan êm êm a awm a, chu chu MLS All-Star game a ni - MLS All-Star hian European club ṭhate an hmachhawn ṭhin a, tun ṭumah hian Premier League champion zo ta lo Arsenal nen an inkhel dawn.

Fans ṭhahnem tak zingah, All-Star ah hian Messi a inlan ve dawn em, tih zawhna a awm thei a ni a, a chhanna chu 'Dawn lo' tih hi a ni. All-Star team-a tel tur hi an thlang fel tawh a, Messi a tel ve hman lo.

Audi Field, Washington D.C-a inkhel turah hian Messi tel ngat se chuan inkhel en an tam phah lehzual sawt ang. Mahse, a tel dawn lo miau a, chutihrual chuan hming langsar tak tak an awm nual tho.

DC United boss Wayne Rooney chuan All-Star team hi a enkawl dawn a, Liverpool striker hlui Christian Benteke (DC United), Barcelona midfielder hlui Riqui Puig (La Galaxy) leh Atletico Madrid tana khel ṭhin Hector Herrera (Houston Dynamo) te chu All-Star team-ah hian an tel.

Messi a thleng

Barcelona forward Messi hian Thawhlehni khan Fort Lauderdale Airport a thleng tawh a, USA-ah a awm tawh - World Cup 2022-a Argentina champion puitu hian US a pan hma hian Bahamas lamah chawlh a hmang a ni.

US-ah a inkhel dawn a, Messi tana thil pawimawh tak pakhat chu sap ṭawng zir a ni. Kum 2021 khan BBC nen an inkawmnaah kum khat leh a chnave zet chu sap ṭawng a zir tawh thu a sawi a, mahse, vawiin thleng hian English-a interview a hmachhawn lai hmuh tur a la awm lo.

Hetihlai hian mi tam takin Messi hi Miami-ah a captain dawn niin an sawi a, mahse, sap ṭawng a la thiam lo reng a nih erawh Messi tan a khelhpuite tihphur a har viau mai thei.

Miami-ah hian Brazilian defensive midfielder Gregore chu captain a ni mek a, mahse, kum 29 mi Gregore hi rei tak a la chawl rih dawn nia sawi a ni - Sergio Busquets leh Jordi Alba ten Messi an zui dawn bawk si a, Messi hian captain armband a hreng nghal a nih pawhin a mak lo ang.

Messi hlawh

MLS club-a Messi hlawh tur chungchangah hian zawhna a tam hle - Inter Miami-ah hian kum khatah dollar maktaduai 50 aṭanga 60 inkar a hlawh dawn niin an sawi a, hei hi chu club lamin an pek tur ngawr ngawr a ni.

MLS thawhpui Apple TV+ leh Adidas aṭangin Messi hian share a nei dawn bawk. Apple hian MLS nen kum 10 chhung thawk dun turin tun hnai khan contract an ziak a, an inremna hi dollar tluklehdingawn 2.5 a tling.

Apple TV+ chuan anmahni kaltlanga MLS enna MLS Season Pass lei an awm apiangin Messi chu share an pe ve zel dawn a, Adidas pawh hian MLS nen an thawhdunna kaltlanga sum an hmuh aṭangin Messi hi share an pe ve dawn bawk.

Messi hian MLS thawhpui tho Fanatics aṭangin share a nei dawn bawk nia sawi a ni a, kum khatah chuan dollar maktaduai 100 chuang chu Argentine forward hian a lalut hrim hrim dawn tihna a ni.

Messi leh a pu Gerardo ‘Tata’ Martino

Inter Miami-in nuam takin Lionel Messi a awm lo ang tih an hlau a, a khelhpui tur player bakah enkawltu tur coach thlengin an thlang uluk - Barcelona leh Argentina-a Messi nena lo inkawp tawh Gerardo 'Tata' Martino chu Inter Miami-ah hian Messi-a pu a ni dawn.

Kum 60 mi Gerardo Martino hian MLS club Atlanta United FC chu September 2016 aṭanga December 2018 thleng kha a lo enkawl tawh a, Major League Soccer Cup-ah champion nomawi kum 2018 khan a chawipui - US-ah a mikhual dawn lo.

Martino hian Barcelona enkawl tawh mah se, season khat bak a cham hman lo a, Spanish Super Cup a chawipui. Mahse, La Liga leh Copa del Rey-ah pahnihna a nihpui a, Champions League quarterfinal aṭangin an tla bawk.

Argentina team nen pawh Copa America final vawi hnih lut mah se a chak lo zawkah an ṭang ve ve a, Messi nen team pahnihah thawk dun tawh mah se mak takin an la hlawhtling lo tihna a ni.

Inter Miami lam chuan US-ah coach ṭha leh player ropui hian hlawhtlinna an chhar dun an beisei ang - a season hmasa berah erawh a khirh nghal deuh mai thei! Inter Miami hi MLS Eastern Conference table-ah a mawngphah luahtu an ni mek a, league match 18 khelh tawhah vawi 13 ngawt an tlawm tawh.

Messi i en thei dawn em?

Kum 36 mi Messi-a'n Miami a pan a, mi tam takin MLS inkhel en an tum nghal ṭhup - India aṭangin he inkhel hi kan lo en ve thei dawn em, tih chu zawhna awm a ni a, vanduaithlak takin television lamah chuan MLS hi pekchhuah a ni dawn lo.

Chutihrual chuan thil hi inthlak thei reng a ni tih hriat a ṭha a, Miami hian Messi an tlangzarh meuh chuan Indian television channel zingah MLS pe chhuak tura broadcasting rights lei an awm lo ang, tih a sawi theih loh.

MLS hi TV kaltlanga kan en theih dawn loh rualin, Apple TV app kaltlangin a en theih dawn a, app-ah hian MLS Season Pass chu lei a ngai dawn - iPhone, iPad, Mac, Apple TV leh smart TV-ah te en theih a ni ang.

App kaltlang kher lo pawh hian web lamah en theih a ni dawn bawk a, tv.apple.com/sports-ah MLS Season Pass kaltlang hian a en theih dawn.
MLS Season Pass hi thla khatah Rs. 1,299-in emaw season khatah Rs. 7,900-in a lei theih. Apple TV+ subscriber ni sa tan tlemin a tlawm leh deuh a, thla khatah Rs 1,199 emaw season khatah Rs. 6,900-in a lei theih.

Hei tak hi Apple kaltlanga Messi-a'n share a nei ve dawn, tih kha a ni a, MLS Season Pass lei an awm apiangin Messi hian hlawh a lo nei ve zel dawn a ni - hemi a nih avang hian Messi sum lakluh hi a tlem thei lo.

MLS hlawh kalphung

Major League Soccer-ah hian club tinte chu uchuak taka sum an sen lohna turin player pakhat hlawh atana an insen theih chin bituk sak an ni a, player pakhat hlawh atan $612,500 aia tam season khatah sen a rem lo.

Mahse, kum 2007-a Los Angeles Galaxy-in David Beckham an lakluh dawn khan MLS chuan dan thar a siam a, chu chu designated player rule (DP) tiin an sawi ṭhin - Beckham Rule titein an sawi bawk.

He dan hnuaiah hian club tinte chu DP pakhat an neih phal a ni a, heng designated player an tihte hi chu hlawh bituk chin an siam hian a huam ve lo - MLS club hian an player langsar lakluh chu kum khatah an duh zat zat an hlawhtir thei tihna a nih chu.

Tunah chuan DP hmun ruak hi tihsan leh tawh niin, club pakhatin DP pathum neih theih a ni. Messi awm hmaa MLS player zinga hlawh hnem ber chu Xherdan Shaqiri a ni a, Liverpool player hlui hian Chicago Fire tana khelin, kum khatah dollar maktaduai riat chuang a hlawh a ni.

Inkhel en man a to dawn

July 21-a Cruz Azul nen an inkhelh hunah Messi hi Inter Miami tana a match hmasa ber khel tura beisei a ni a, Miami a zawm tur thu a chian hma kha chuan ticket hi $29 (Rs. 2,386) a zawrhchhuah a ni.

Mahse, Miami-in Messi an lak hnuah Mexican club nena an inkhel en man ticket hi nasa takin a sang nghal a, ticket man tlawm ber chu $350 (Rs.28,799) a ni nghal niin khawthlang media-te chuan an tarlang.

Messi inkhel en man hi season tluanin a tlawm vak a rinawm tawh lo niin a hrechiangte chuan an sawi a, anmahni mual leh khualmuala an khelh hunah pawh $300 (Rs. 24,685) vel zelin ticket hi an zuar chhuak dawn niin an sawi.

Miami-i'n Messi an neih theih nan sum tam tak an seng a, amahah mai duhtawk loin a khelhpui ṭhin a ṭhiante thlengin an sawm lut a, an player chhuanvawr inkhel lai en man an tisang viau pawh hi an demawm hran lo - khawvelin Messi inkhel a hmu châk tih an chiang a, sum an mamawh
bawk.