Mizoram Covid-19 thla tin dinhmun Sept.-ah hripui vei 1,004 hmuh a ni
Mizoramah kumin March-September (thla sarih) chhungin Covid-19 vei mi 2,018 hmuh chhuah a ni a, hmuh chhuah tam ber leh dam tawh chhuak an tam ber thla, September-ah hmuh chhuah zat mi 1,005 leh chhuahtir zat mi 987 an nia hriat a ni.
Tarlan tawh ṭhin angin, Mizorama Covid-19 kai hmuh hmasak ber Rev. VL Hruaia Khiangte chuan hripui a vei tih March 24, 2020-ah Guwahati Medical College-ah hmuh chhuah a ni a, hei hi thla thum chhung - March, April leh May thlaa Mizorama hripui kai awm chhun a ni.
May thla tawp lam aṭangin Mizoram páwn, India ram chhunga Mizo awm tangkhangte an rawn haw ṭan a, June 1, 2020-a swab sample endik zingah hripui vei mi 12 hmuh chhuah a ni. Hei hi Mizoramah Covid-19 positive pakhat hmuh a nih aṭanga thla hnih chuang hnua hripui vei hmuh lehna hmasa ber a ni. June 1 aṭang erawh hi chuan ni tin deuh thawh Covid-19 positive hmuh belh a ni tawh thung.
Record-a a lan danin, Mizorama Covid-19 vei hmuh chhuah zat chu - March thlaah mi pakhat, June thlaah mi 159, July thlaah 253, August thlaah 600 leh September-ah mi 1,004 a ni.
Hetih lai hian, Mizorama hripui kai hmasa ber chu State Referral Hospital (ZMC)-ah ni 46 chhung enkawl a nih hnuah May 9 khan dam takin chhuahtir a ni a; June 1 aṭanga hripui vei hmuh chhuah ṭan a nih leh hnuah, dam tawh chhuahtir pawh June thla tàwp lam aṭangin an awm leh ṭan nghal.
Covid-19 positive, enkawl an nih hnua negative leh ta thla tina chhuahtir zat chu - May thlaa mi pakhat, June thlaah mi 121, July thlaah 138, August thlaah 350 leh September-ah mi 987 an ni.