Saichalah heroin kg. 5.114 man

Excise & Nar­cotics depart­ment (END) leh Assam Rifles sipaite chuan July 14 & 15 khan hmun pahnihah heroin kg. 5 leh gram 114 an man. Heroin hi Rs 25,57,00,000 hû a ni a, Myanmar aṭanga lak, state danga hralh tur a ni.

END leh 2nd Assam Rifles chuan July 14, 2023 khan an thudawn bawhzuiin, Saichal bulah ruihhlo phur nia rinhlelh lirthei an cháng a; chawhnu dar 2:15-ah lirthei pahnih - Bolero AR-02 M-0543 leh Grand Vitara car TR-07 F-0451 aṭangin heroin kg. 5 leh gram 114 (hawng 436) an man. Heroin-a inhnam­hnawih mi pahnih Jahir Alam (23), Ashabari, Sepahijala district, Tripura leh Maram Miah (32), Pandabpur, West Tripura nia inchhálte an man nghal bakah, an lirtheite an hrènsak.

AR leh END ṭang dun hian heroin an man an chhui zuinaah July 14 vêk tlai dar 4:30 khan inhnamhnawih dang - Lalngilneii (44) leh Zoramchuana (49) Hnahlan (Chaltlang Lily Venga khawsa mek) te, Vungkhan-thawma (23) Champhai Vengthar te, Amir Hussain (31), Madhya Boxanagar, Tripura leh, Sukanta Karmakar (35) Champak Nagar, Jirania district, Tripura nia inchhálte hi an man bawk.

42nd Assam Rifles sipaite chuan Champhai police-te nen ṭanghoin July 15, Inrinni khan Champhai Zote-ah heroin gram 73 an man bawk a; heroin hi Rs 51,10,000 hû a ni a, a neitua puh Lalvulluaia (40), Champhai Kahrawt leh mi dang pakhat an man nghal a ni.