Sorkar kum kal mekah a ṭum thum nan OMB hmanga sum pûk leh a ni dawn

Mizoram sorkar chuan open market borrowing (OMB) hmangin loan cheng vbc. 80 a pûk leh dawn a, sorkar kum kal mek 2023-24 chhungin ṭum thum a pûkna tur a ni.

Vanglaini thu dawn danin, Mizoram sorkarin OMB hmanga sum a pûkna tura tih tur ṭulte chu Reserve Bank of India (RBI)-in a buaipui a; RBI chuan OMB hmanga Mizoram sorkarin sum pûk tur zawn a nih thu July 14, 2023 khan a tarlang.

OMB hmanga sum pûk a nih theih nan RBI-in state sorkar tana sum pûktir thei tur a zawng a, financial institution-te'n an chháng ṭhin. Mizoram sorkar sum pûk tur chháng duh tan RBI chuan July 18, 2023 (Thawhlehni) thleng hun a hawng.

OMB hmanga sum pûk chu kum khatah a pung nen vawi hnih rulh tur a ni a, kum 10-15 velah sum pûk zawng zawng rulh a ngai a; a punna chu 7-8% vel a ni.

Mizoram sorkar hian kumin sorkar kum kal mekah a ṭum khatna atan May thla laihâwl khan OMB hmangin cheng vbc. 250 a pûk a, June thlaah cheng vbc. 100 a pûk leh bawk. Tun ṭuma a pûk tur hi financial year kal mekah vawi thum a pûkna tur a ni.