Party president leh chief minister nihna mi pakhatin a chelh kawp dawn lo - Duhoma

ZPM leader Lalduhoma chuan, ZPM lamin sorkar an inrinna aiin party dangin an rinna a nasat zawk thu leh ZPM a sorkar chuan party president leh chief minister nihna mi pakhatin a chelh kawp dawn loh thu a sawi. Lalduhoma hian mithar lawmlutin, lawmluh zingah Central YMA OB hlui K Chalkhuma, Armed Veng a tel.

Lalduhoma hian July 15, Inrinni khan Aizawl East-II ZPM-in Armed Veng South community hall-a mi thar lawm luhna an buatsaihah thu sawiin, "ZPM lamin sorkàr kan inrinna ai mahin party dangin min rinna a nasa zawk. Kan va tihbuai pawh ni loin anmahni an buai em em a, kan party buaipuiin an buai em em a, thu hlui pawh an post nawn tlut tlut peih. ZPM hian beih kan tawh nasat pauh leh kan pun phah zel a, hmun tinah kan pung zel," a ti.

Chief minister lal lutuk ṭhin chu kal­phung thar hmangin an tidanglam dawn tih sawiin Duhoma chuan, "Party president leh CM nihna hi mi pakhatin a chelh kawp dawn lo. Works portfolio a khawih ve lo ang. CM-in a chan loh theih loh department a awm. CM-in portfolio a chang dawn lo, tih hi kan sawi lo a, a chan loh theih loh department a awm. Works department a chang dawn lo kan ti a ni," a ti a, chu chu kalphung thar pakhat a nih thu a sawi.

Lalduhoma chuan, an ngaimawh em em chu corruption a ni tih sawiin, "Kalphung thar hmangin kan do dawn. Lokayukta kan thuam chak ang a, CBI koh luh pawh kan sawi, PAC-ah kan rêl tawh. Kan police kan ring lo tihna a ni lo. Society-a inpawh tak tak, kohhran khata láwi, pawl hrang hranga inhmangza inchhui hi tu tan mah a nuam lo. Chutiang ngaihtuah ve lo CBI kan ko lut dawn a ni,” a ti.

ZPM Leader chuan, sorkar file muangcháng lutuk leh buaithlak thil tam tak a awm tih sawiin, "Hun tiam chhung bitukin a chinfel hun kan siam ang a, chinfel a nih loha complaint-na tur thuneitu sang tak kan siam bawk ang," a ti a; hna laknaa duhsak zawngte thun remchanna board phuahchawp an ti ve dawn lo a, MPSC kutah an dah dawn tih a sawi.

Restricted tender chungchang sawiin Lalduhoma chuan, "A nihna ang taka kan hman chuan restricted tender hmanna tur a váng khawp. Kan ti bo ang kan ti thei ngawt lo a, mahse, a nihna ang taka kan kalpui dawn avangin restricted tender tih rî kan hre khát khawp ang," a ti. Mipuiin party sorkar an ning ut ut tawh a, mipui sorkar an duh tak zet tawh thu leh ṭhangthar zingah kalphung tihdanglam duh, páwl âtchilh lo, sorkar ṭha duh an tam thu a sawi bawk.

Aizawl East-II viltu B Lalchhanzova pawhin thu sawiin, ram hruaitu thlanah an ngaihdan leh duh zawng tilang ngam turin mipui a chah a, "ZPM chuan mipui hnena beiseina pek hi kan tum ber a ni. Ram tana thil ṭha kan sawi pawhin party dangte hian min sawichhe nghal zel a, thil ṭha tih kawngah party dangte thurualpui kan châk, mahse, an duh si lo," a ti.

ZPM zawm thar mi 621 lawm luh an nih thu ZPM thuchhuahin a tarlang. Lawmluh zinga mi K Chalkhuma chu kum CYMA OB term hnih (2001-2005) lo ni tawh ni a, a term hnihah hian treasurer post a chelh ve ve.