Dâwt puangzara Minister-in a puhna MJA, Kolasib District-in ná an ti

MJA, Kolasib District chuan thuchhuah siamin, minister K Lalrinliana, Kolasib bialtu MLA-in dâwt puangzara thehdarhah leh eptu party mi ni anga Kolasib District MJA a puh chu ná an tih thu leh, MJA member-te an awmna party nen a hriat vek thu sorkar official leh party worker-te hriat laia a sawi chuan a barakhaih thu an tarlang.

Krishi Vigyan Kendra (KVK), Kolasib ram tlawhnaah an beisei loh leh an rin loh takin minister K Lalrinliana'n Kolasib MJA-te dâwt puangzarah a puh tih sawiin Kolasib MJA chuan, "Dâwt puangzar/thehdarh a, eptu party ang hiala min puhin, MJA member-te chu kan awmna party nen lam a hriat vek thu, amah ṭawiawmtu official leh party worker-te hriat laiin a sawi chiam mai hian min barakhaih tak zet," an ti.

MJA, Kolasib chuan, "Dâwt puangzar anga inpuhna leh eptu party ang hiala inpuhna hi MLA/Minister leh politician dang reng reng ká aṭanga kan la hriat ngai loh a nih vangin tun ṭuma thil thleng pawh hi mak kan ti a, ná pawh kan ti hle," an ti a; Minister-in KVK a tlawhnaa a thil sawi lai video clip thehdarh chu a ṭhen azar chauh lang tura duh lai lai 'cut ṭhen' tawh a nih thu an sawi.

KVK, Kolasib ramah in hmun ṭheh tumna a awma an hriat avangin thil awmzia hriat tumin chanchinbumi ṭhenkhatin July 6, 2023-ah a hmunah an tlawh a, KVK ramah in hmun ṭhehna tur perh (peg) tam tak khen a ni tih an hmu. Khawtlang hruaitu ṭhenkhat hnenah thil awm dan an zawh aṭangin Vengthar MNF party hotute hmalakna a nih thu an dawng.

Kolasib MJA chuan, "KVK-in an hriatpui loha perh khen a nih avangin dan loa ram chhuh luih tumna (encroachment) niin kan ngai. Mi ṭhenkhatin party pakhat press release behchhana puangzar anga min sawi hi dâwt a ni a, eng party-in nge KVK ram chungchangah hian press release siam kan la hre lo. A hnuah Kolasib MLA Pu K Lalrinliana'n he lai ram hi a tlawh ṭumin ama tihtir a nih thu a sawi," an ti.

Kolasib MJA tarlan danin, minister K Lalrinliana'n 'In hmun nei lote'n in hmun an beiseina hmun KVK ram a tlawh tur thu' hriattirna copy MJA-in an hmuh avangin July 12, 2023-ah chanchinbumi ṭhenkhat chu a hmunah an kal a, chuta kalte chu pawl hminga kal ni loin, mimala news cover tura kal an ni.

MJA, Kolasib District chuan, "In hmun nei lo tak tak leh mamawh ngawih ngawih, khawtual mi nghet ngeite'n in hmun hi nei ngei se kan duhpui zawk. Chumi kawngah chuan sorkarin dan a nei a, dan angin engkim kaltir hmasain hmalak ni ṭhin se tih hi kan duh dan a ni," an ti a; in hmun nei lote'n in hmun an neihna tura hmalakna chu an dodal ngawr ngawr lo tih an tarlang.

KVK, Kolasib ram, mimal in hmun atan ṭheh tumna awm mekah MNF, Kolasib Block press release (PRESS RELEASE No. 124/IT&P, MNFKLB/2019-2023)-in chanchinbumite chu dâwt puangzar/thehdarhah an puh bawk tih tarlangin MJA chuan, "He thil hi MJA, Kolasib District hmai tibâl thei a nih avangin kan ngai thutak (serious) hle," an ti. July 14, 2023-ah emergency meeting an neih hnuah thil awmzia dik tak sawifiahna press release an siam a ni.

KOLASIB MJA TARLAN DANGTE

■ Kolasib MJA member-te hi mi famkim leh fel bik kan ni lo a, tlin lohna kan nei thei. Chanchin thar thehdarh kawngah a páwnga takin thu dik lo leh dâwt kan chhuah kan la hre ngai lo. Inhnialna tichhuak thei chi angah phei chuan thu lâkna rintlak kan neih loh chuan kan puangzar ngai lo. KVK ram ṭheh tumna awmah pawh department hotute berin an hriat loh avangin keini chuan dan loa ram neihsak tumna (encroachment) niin kan hria a, source rintlak tak neiin kan puangzar a ni.

■ MJA innghahna 'Service to the people (mipui rawngbawltu)' a nih avangin ram leh khawtlang tana ṭha turah chuan huaisen takin ke kan pên ṭhin. Kan thu puanzarah dâwt a tel a nih chuan MJA-te hian ngaihdam kan dil hreh lo. Dâwt puangzar anga inpuhna leh eptu party ang hiala inpuhna hi MLA/Minister leh politician dang reng reng ká aṭanga kan la hriat ngai loh a nih vangin tun ṭuma thil thleng pawh hi mak kan ti a, ná pawh kan ti hle. Thu thar kan puanzarnaah lungawi lohna an nei a nih pawhin vantlang hmaa sawi hian awmzia a nei lo a, tun hnuah thleng tawh lo se kan duh tak zet.

■ Eizawnna atana chanchinbu/media hmangtute hi mithiam bik kan ni lo a, hei vang hian mi thiam zawkte ruaiin a khát tâwkin workshop leh seminar kan nei ṭhin. Kan tlin lohna tam takah hmasawn zel tumin theihtawp kan chhuah ve a, heti chung hian kan thlen chin a la thui lo tih kan hai lo. A thiam zawk leh tih dan ṭha zawk hria chuan media rawngbawlna pawimawh tak hi luhchilh turin kan sáwm a, kan luhchilh thei lo a nih pawhin min finchhuah turin kan inhawng reng.

■ Minister Pu K Lalrinliana hi ministry kal mekah minister fak hlawh páwl tak a ni a, ram tana a hmalakna hrang hrangah kan lo thawhpui tawh ṭhin angin thawhpui zel pawh kan duh. A kaihza véngtu party mi te, Kolasib bial mipui leh Mizoram hmun hrang hranga mite pawhin Minister hi a hmalaknaah dan zah tak chunga ṭawiawm zel turin kan beisei a, kan sawm nghal a ni.