Samthang khuain zîkhlûm Qtl 1,500 vel hralh tawh

Samthang khuaa zîkhlûm chíngtute chuan kumin fùr chhungin zîkhlûm quintal 1,500 vel an hralh tawh a, chuta ṭang chuan Rs 4,95,000 vel an la lut tawh.

Samthang Farmer Association chairman PC Lallawmsanga sawi danin, kuminah Samthang khuaa chhungkaw 85-in zikhlum an chíng a, Horticulture department leh FOCUS aṭangin zikhlûm chìn tur a chi leh ṭanpuina dang an dawng. Zikhlûm chíngtute chuan tunlai hian an thar mek a ni.

PC Lallawmsanga sawi danin, Samthang khua hian fùr zikhlumte chu July thla tìrah an thar ṭan a, tun thlengin quintal 1,500 vel hralh tawhin, Rs 4,95,000 vel an la lut tawh. Kuminah quintal 5,000 vel thar an inbeisei a, tuna an hralh dan ang rate chhûtin Rs 16,50,000 an la lut thei dawn a ni.ṭ

Zikhlumte chu Mizoram hmun hrang hrangah an hralh a, tender hmangin an hmunah an hralh ṭhin. Kg. khat Rs 20-32 velin an hralh mek a, August thla tàwp thleng hralh tur an neih an beisei.

Samthang khaw mite hian kum 2005 aṭangin kum tin fûr zikhlûm an chíng a; an khaw ṭhenawm - Vaphai, Farkawn, Khankawn, Thekte, Thekpui leh Vangchhiaahte pawh kuminah an thar tawh a, a man (rate) inang tlângin an hralh ṭhin a ni.

Kumin ṭhálah ruahtui a tlâk tlai avangin zikhlûm an phun hma thei lo tih sawiin PC Lallawmsanga chuan, "Zikhlûm kan phun tlai deuh avangin fûrah a ṭawih nasa a, kan zikhlum tharte dahṭhatna tur cold storage kan mamawh hle a ni," a ti.

PC Lallawmsanga chuan, Samthangin zik­hlûm ṭha taka an hralh theih nan Commerce & Indus­­tries department hotute'n theihtawp an chhuahpui ṭhin avangin an lawm thu a sawi a; zikhlûm an thar vanglai taka phai lam aṭanga lut a awm ve reng ṭhin avangin a hralhnaah harsatna an tawh ṭhin thu sawiin, phai lam aṭanga zikhlum la lut ṭhinte chu Mizorama kut hnathawktute'n zikhlum an thar vanglai chuan phai aṭanga la lut lo turin an ngen tih a sawi bawk.