CCHFW-ah Health Minister-in Hriselna lama hmalak dan a sawi
Ministry of Health & Family Welfare (MoHFW) leh Uttarakhand sorkar buatsaih, 15th Conference of Central Council of Health and Family Welfare (CCHFW) / Swasthya Chintan Shivir chu July 14-15, 2023 chhung khan Uttarakhand khawpui Dehradun-a Hyatt Regency-ah neih a ni a; Health minister Dr R Lalthangliana telin, Mizoram sorkarin hriselna lama hma a lak dante a sawi.
CCHFW hi Indian Constitution Article 263 tlawhchhana din a ni a, India rama hriselna lama sorkar hmalakna chungchanga inràwnkhawmna sang ber a ni. Tun ṭum inkhawmpuiah hian Union Health Minister, MoHFW hotu te, state tina health minister leh health secretary te, National Health Mission (NHM) mission director-te an tel.
Hawnna inkhawmah Dr R Lalthangliana chuan, Mizoram sorkarin hriselna lama hma a lak dan leh mamawhte a sawi a; Mizoram sorkarin MoHFW hnenah Lungleia GNM School tihchangtlunna tur project a thehluh tawh chu pawm thuai turin sorkar laipui hotute a ngen. Zemabawka GNM School tihchangtlunna tur project pawh an thlen leh tur thu leh ngaih pawimawhsak ngei tura a duh thu a sawi bawk.
Minister hi Health secretary Esther Lal Ruatkimi leh NHM mission director Dr Eric Zomawia ten an ṭawiawm a ni.
DR R LALTHANGLIANA SAWI ṬHENKHAT
▶ NITI Aayog-in a tehnaah kum 2017-18 aṭangin Mizoram chu India ram state tê zingah hma la ṭha ber a ni ziah.
▶ Mizoram chu nau piang kum khat hnuaia thi, infant mortality rate hniamna ber a ni mek (nausen 1,000 zelah pathum thi ang a ni).
▶ Zoram Medical College-ah kum 2019-20 khan khum 300 a awm a, tunah khum 480 a awm tawh.
▶ ZMC-a ICU khum pawh 50 kan nei hial tawh a, district tinah oxygen plant kan dah.
▶ Mizoram mipui thleng kim tur Universal Health Coverage tihhlawhtlin tum mek a ni.
▶ World Bank ṭanpuinain Mizoram Health Systems Strengthening Project kan kalpui mek.
▶ Damdawi-in ṭha leh rintlak nei turin district hospital pathum, PHC pathum, UPHC pahnih leh sub-centre 75-te tan national level NQAS certification dil mek a ni.
▶ Mizoram State Health Care Scheme-ah health insurance tihchangtlunna atan Asian Development Bank nen cheng vbc 1,000 project siam a ni.
▶ JICA nen cheng vbc. 700 sênga Mizoram State Super Specialist Cancer Research Centre dinna turah a hmáwr bàwk a ni ṭêp tawh.
▶ Tun hnaiah NEC aṭangin Aizawlah HIV/AIDS Resource Centre sakna tur sum leh cheng vbc 13 man Central Medical Warehouse sakna tur hmuh a ni.
▶ Health & Wellness officer, BSc Nursing graduate vek mi 300 chuang kan nei.
▶ PHC 64 leh sub-center 309 chu health & wellness center-ah hlan kai a ni.