Covid-19: Mizoram dinhmun Hmuh thar 31, chhuak thar 124

September 30, Nilainia Mizorama swab sample 1,252 endik aṭangin Covid-19 vei mi 31 hmuh chhuah a ni a, state pawn aṭanga tun hnaia rawn lut vek niin, Mizorama kái chhâwng (local positive contact) an awm lo. Nimin khan mi 124 chhuahtir an ni thung.

Nimin khan ZMC laboratory-ah mi 215-te swab sample endik a ni a, nimin tlai khan result chhuak nghalin, Covid-19 vei hmuh chhuah an awm lo tih puan a ni.

Covid-19 vei Nilainia hmuh chhuahte chu ZMC laboratory-a hmuh chhuah mi 15, Lawngtlai District Hospital-a hmuh mi panga leh Rapid Antigen Test hmanga hmuh chhuah mi 11 an ni.

Hripui vei zinga dam tawh nimina chhuahtirte chu - State Referral Hospital aṭangin mi pali, covid care centre hrang hrang - Monfort School aṭangin 34, Finance building, ITI aṭangin 21, Tribal Art Centre-ah pakua, Hlimenah 15, Zokhawsangah pathum, Sakawrdaiah pakhat, Zobawkah 19, Lunglei Pukpuiah pakua, Thing-dawl aṭangin pathum leh home isolation-a awm paruk an ni.

Mizorama Covid-19 vei hmuh chhuah tawh zat mi 2,018 an ni a, mipa 1,657 leh hmeichhia 361 an ni. An zinga mi 1,721 (85.28%) an chhuak tawh a, enkawl mek mi 297 (14.72%) an awm. La chhuak lo zingah hripui an vei tawh lo an awm nual bawk.

September 30-a ZMC laboratory-a hripui vei hmuh chhuahte chu mipa 14 leh hmeichhia pakhat niin, Aizawl district-a swab sample lak vek an ni a; tun hnaia state páwn aṭanga Mizorama rawn lut, civil mi pahnih leh sipai 13, khung hran lai vek an nih thu sorkar thuchhuahin a tarlang.

ZMC-a hmuh tharte chu - Chanmari hmeichhia kum 40 mi, tun hnaia Karimganj, Assam aṭanga rawn haw a ni a; civil mi dang pakhat chu mipa kum 39, Dawrpui Vengthara cheng niin, September 21-a Assam aṭanga rawn lut, quarantine facility-a awm mek a ni.

ZMC laboratory-a hmuh chhuah dang 13-te chu BSF sipai vek, kum 29-52 inkar, tun hnaia state páwn aṭanga rawn lut, quarantine facility-a awm lai an ni. ZMC-a hmuh chhuah mi 15 zingah Covid-19 symptom nei an awm lo.

September 30 khan Lawngtlai District Hospital-a TrueNAT laboratory-ah Covid-19 vei mipa panga, kum 19-45 inkar mite hmuh chhuah a ni a, an vaiin Border Roads Organisation (BRO) hnuaia thawk, Jharkhand aṭanga tun hnaia rawn lut, quarantine facility-a khung hran lai an ni.

RAT hmangin Aizawlah hripui vei pakhat hmuh chhuah a ni a, mipa kum 56-a upa, Serchhipa awm Assam Rifles sipai niin, a dam loh vangin inentir tura Aizawl Civil Hospital-ah a kal a, rinhlelh a nih avangin RAT hmanga endik a ni.

Kolasib district-ah pawh RAT hmangin Covid-19 positive mi 10, mipa 9 leh hmeichhia pakhat hmuh chhuah a ni a, kum 18-35 inkar an ni. Mi pasarih chu Counter Insurgency & Jungle Warfare School (CIJWS), Vairengtea awm sipai an ni a; mi dang 3 pawh CIJWS mi leh sa niin, Lailapur, Cachar district-a awm an ni thung. Lailapur-a awmte hi ICMR application (Mizoram ID) hmanga buaipui an nih avangin Mizoram record-ah chhiar an nih thu, sorkar thuchhuahin a tarlang.

September 30 khan Mizoramah mi 1,252-te swab sample endik a ni a; ZMC-ah 364, TrueNAT-PCR hmangin district parukah mi 59 leh RAT hmangin district pariatah mi 829-te sample endik a ni.