2019-a ramri buaina bul ber in sak Assam sorkarin a luah nghet

Vairengte leh Lailapur (Assam) inrìnaah Assam Forest department-te'n in an sak (thawm ṭhat) avangin July 6, 2019-ah buaina tênau a chhuak a; buaina chhuah chhan - in sak chu tunah chuan Assam Forest department-in an luah nghet tawh hle.

July 6, 2019-a Mizoram leh Assam inkara buaina thlen chhan ber chu - July 6 (Inrinni) zingah Assam Forest department-in Vairengte leh Lailapur inkara tun hmaa in an sak tawh chu an sak chhunzawm vang a ni.

Assam Forest-te'n in an thawm ṭhat lai hian Forest guard-te'n silai nen an veng a; an hmalakna thâwm hriat a nih hnuah Mizoram Police-te pawhin a hmun an pan a, Vairengte tualchhung mi tlem azawng an kal bawk a; chuti chung chuan Assam lam chuan an hnathawh chu an chhunzawm zel tho.

July 6 tlai lamah in sakna hmunah Kolasib SP leh Cachar DFO-te an inbia a; Cachar DFO chuan in sak (thawm ṭhat) chu chhunzawm tawh loh a remti a, an titawp a ni. Chutih laiin, in chu sak zawh thawkhat a ni tawh a, July 7-ah Assam Forest-te'n an luah nghal a ni.

Buaina chhuak kaihhnawihah hian Mizoram police chuan Vairengtea Police checkgate aṭanga metre 100 vela hlá, Pioneer ho camp hluiah IR platoon khat (mi 30) an dah nghal a; Assam lam pawhin Lailapur-a Mizoram lam hnaih ber in aṭanga metre 30 velah an police-te an dah ve bawk.

Vairengte leh Lailapur inkara in hlui, Assam Forest department-in nikum July thla tìr lama an thawm ṭhat chu tunah chuan Assam Forest department-in an chei hnúm tawh hle a, an luahlum nghet tawh hle nia thu dawn a ni.