Thla 6 chhunga BSL-3 laboratory Din thei loah Mizoram sorkar puh

Congress party MLA Lalrindika Ralte chuan nimin khan Aizawl Press Club-ah thuthar theh-darhtute a kâwm a; Mizoram sorkar chu thla ruk chhunga BSL-3 laboratory din thei loah a puh.

Lalrindika Ralte chuan, Covid-19 avangin Mizoramah kumin March tàwp lam aṭangin inkhàrkhip ṭan a nih thu sawiin, "Thla ruk pumhlûm chu Covid-19 avangin kan buai tawh a ni. Hetih chhung hian Mizoram sorkarin ama pualin RT-PCR kháwl hman theihna tur BSL-3 laboratory pakhat pawh a din thei lo," a ti.

RT-PCR khawl hman theihna tur BSL-3 laboratory din turin Congress party-in sorkar an ngen tawh ṭhin thu sawiin Lalrindika chuan, "MNF sorkar hotute'n BSL-3 laboratory din harsatzia leh hautakzia an sawi zel a, thla ruk hnuah pawh an din thei lo," a ti a; Falkawna District TB Centre endikna atana din mekah RT-PCR hawh chawpin swab test kalpui a nih thu a sawi.

Lalrindika Ralte chuan, September 29 khan MPCC Media-te'n Falkawna labo-ratory chu an tlawh tih sawiin, "He laboratory hi an sawi dan nen a inang lo nasa hle tih hriat a ni," a ti.

Hachhek bialtu MLA sawi danin, Falkawna Covid-19 swab sample test tihna in chu chhâwng li a ni a, chhawng hnuai berah TB vei damlote awmna ward a awm a, a chung chiah chu swab sample endikna a ni. Chhâwng thumna chu District TB Centre office a ni a, ni tin damlo eng emaw zatin an pan ṭhin a; chhâwng chung ber chu Covid-19 veite dahna atan hman a ni ṭhin.

Swab sample endikna laboratory atana an hman chin tak chu ft. 30 bial vel a ni a; BSL-3 laboratory din a hautakzia, hlauhawmzia leh fimkhur a ngaihziate uar taka sawi ṭhin a nih laiin, BSL-3 laboratory hnuaiah TB veite enkawlna ward a awm. Sorkar hotute sawi anga hlauhawm a nih chuan, TB vei damlo awmte leh office-a thawkte tan a hlauhawm hle dawn tihna a ni.

TB laboratory din chu National TB Elimination Programme hnuaia mi a nih thu sawiin Lalrindika chuan, "Mizoram sorkarin Covid-19 endikna atana a hman ṭan lai pawh khan zawh a la ni lo. Ruahman lâwk dan chuan June 2020 vel aṭangin TB endikna atana hman tum a ni. Chutiang tur chuan bungraw tam tak a lo thleng tawh," a ti.

Hachhek bialtu MLA Lalrindika Ralte chuan, TB endikna atana laboratory hmang turin Central TB Division-in a pawmpui a ngai tih sawiin, "Covid-19 test-na atan hman a nih daih avangin Central TB Division lama thuneitute pawhin vawi eng emaw zat an rawn nawr tawh a, laboratory hi cancel a hlauhawm hle," a ti a; Covid-19 endikna atan hman chu TB veite pawhin an tawrh phah niin a sawi.

Congress Legislature Party leader Zodintluanga Ralte-in RT-PCR khawl a pek chu thla thum chhung hman lohin Lunglei Civil Hospital-ah dah a nih thu sawiin Lalrindika chuan, "BSL-3 laboratory din hi an sawi ang em ema hautak a ni lo tih a chiang. Mizoram sorkar hian tum se thla ruk chhungin a din thei ang. May 21, 2020-a Nagaland CM-in BSL-3 laboratory a hawn kha ni 32 chhunga din a ni," a ti.

Lalrindika Ralte sawi danin, swab sample endik tur inhnawh khawm leh result chhuak har lutuk vanga buaina thleng chu MNF sorkarin BSL-2/3 laboratory a din theih loh vang a nih thu sawiin, "Nagaland sorkar pawhin ni 32 chhunga a din theih laia MNF sorkarin pakhat pawh a din thei lo hi a mak tak zet," a ti a; BSL-3 laboratory dang din thuai turin Congress party-in sorkar an phût tih a sawi.

Politics-ah thu dik tâwk lo mipui hrilh an nih ṭhin thu sawiin Lalrindika chuan, "Dik chu dik, dik lo chu dik lo tih mai tur a ni. Tun ṭumah pawh hian sorkar tihmualpho tum vang a ni lo a, mipuiin thu dik hria se kan duh a ni," a ti.