Sorkar hospital 11 zinga pangaah nurse thawk nghet lo an tam zawk

Mizoram sorkar damdawi-in (hospital) 11 zingah nurse thawk 541 an awm a, chu'ng zinga 243 chu a nghet loa thawk an ni. A ngheta thawk aia a nghet loa thawk tam zawkna damdawi-in panga a awm.

RTI Act tlawhchhana zawhna Health & Family Welfare department-in an chhan danin, March 31, 2023 dinhmun angin, sorkar damdawi-in (hospital) 11-a nurse thawk mi 541-te chu sorkara a ngheta thawk mi 298 leh a nghet loa thawk mi 243 an ni a; a nghet loa thawk aiin a ngheta thawk mi 55-in an tam zawk.

Nurse thawk zatah hian primary health centre, community health centre leh sub-district hospital-a thawkte dinhmun zawhna chhannaah tarlan tel a ni lo.

Sorkar damdawi-ina a nghet loa nurse thawk 243-te chu state contract mi 25, National Health Mission (NHM) hnuaia thawk 201, AYUSH hnuaia thawk pathum, MSACS hnuaia thawk pariat leh Socio Economic Development Programme (SEDP) hnuaia thawk mi paruk an ni.

Hospital 11 zingah nurse, sorkara a ngheta thawk aia a nghet loa thawk tamna damdawi-in panga a awm. Champhai District Hospital-a nurse 48 zinga 37 (77.08%) chu a nghet loa thawk niin, a ngheta thawk mi 11 chiah an awm a; Siaha District Hospital-ah a ngheta thawk mi paruk lêta tam a nghet loa thawk mi 17 (73.91%) an awm.

Lawngtlai District Hospital-ah nurse 16 zingah thawk nghet mi panga leh nghet lo mi 11 (68.75%) an awm a; Mamit District Hospital-ah a ngheta thawk mi pali leh a nghet loa thawk mi pasarih an awm a; Serchhip District Hospital-ah thawk nghet mi 12 leh nghet lo mi 14 an awm bawk.

Hetih lai hian, nurse zawng zawng aṭanga a ngheta thawk tamna ber chu State referral Hospital a ni a, nurse thawk zat 73 zinga 64 (87.67%) chu a ngheta thawk an ni.

Damdawi-in lian ber, Civil Hospital, Aizawlah nurse 203 an awm a, state sorkara a ngheta thawk mi 110 leh a nghet loa thawk mi 93 an ni a, thawk nghet mi 17-in an tam zawk.