Mamit district-ah kuhva rah man

Nimin zing khawvar hma khan Mamit district-a New Eden leh Tumpánglui inkarah tipper-in kuhva rah ro tam tham tak a phurh man a ni a, kuhvate chu hàl nghal a ni.

Thu dawn danin, kuhva rah manna lirthei MZ-01 Y-6901 hi Ashok Leyland tipper a ni a, kuhva phurhna turin a hnung lam body chu a bika siam dang lam niin, Zuangtuia workshop pakhatah siam danglam a ni. Tipper body chu a lai velah a chhuat siam belh niin, chhuat hnuai lamah kuhva rah an phur a, chhuat siam belh chung lamah lei leh hnawmhnawk dang an phur thung.

Tipper hi Tuidam lam kawnga kal niin, Tripura lama tlan luh tum a ni a, kuhva chíngtute'n duty tura an dahte'n ringhlelin an lo tiding a, an enfiahnaah kuhva rah an hmu a ni. Kuhva rahte chu ipah thun a ni lo a, tipper chhuatah a lâwngin dah a ni.

Lirthei khalhtu sawi danin, kuhva neituin Mamitah police duty pathum vel bak an awm dawn loh thu te, an lo tiding a nih chuan balu phur tur anga insawi tur te, tipper body an endik a nih pawhin lei leh bawlhhlawh paih tur phur nghal anga insawi turtein a chah a ni. Mamit checkgate-ah police-te'n an lo tiding a, tipper body chhung erawh an endik lo.