Eiruk thubuaiah mi pakhat Court-in thiam loh a chantir

Cheng nuai 8.56 tihchingpen thubuaiah Aizawl District Court-a special judge (Prevention of Corruption Act) Dr HTC Lalrinchhana chuan nimin khan Telecom department-a SDO(T) hlui Subhrendu Deb Roy, Kolkata chu thiam loh a chantir a, vawiinah hremna tur puan a ni ang.

Court judgement-a tarlan danin, kum 1995-1997 chhung khan Telecom department-a officer pathum - Swapan Kumar Bose (L), Krishna Brata Som (L) leh Subhrendu Deb Roy te chu K Sena (L) thurualpuiin Aizawla telephone hrui thlunna cheng nuai 8.56 tichingpenah puh an ni.

Swapan Kumar Bose lakah thu tling hmuh a nih loh avangin court chuan thubuai a ngaihtuah tirh lamah a chhuah fihlim tawh a; Krishna Brata Som chu a thih tawh avangin February 8, 2016 khan Subhrendu Deb Roy lakah chauh thubuai ziah luh a ni.

Dan bawhchhe tura inthurualin Rova Engineering Works, MK Battery Works, SR Works, Eric Automobile Service leh KL Steel Fabrication-te quotation lehkha lem hmanga pawisa tihchingpenna leh uchuaka rate sanga hna inthawhtirnate chu a chhuitu CBI-in court-ah an finfiahah ngaiin, court chuan Subhrendu Deb Roy chu thiam loh a chantir a ni.