ZPM an beihna hrang hrangte hi belhchian dâwl lo a ni - Lalduhoma

ZPM leader Lalduh­omna chuan, kumina MLA inthlan awm turah hian thawhpui neih an tum loh thu leh political party dangte'n ZPM an beihna hrang hrangte chu belhchian dâwl lo a nih thu a sawi.

Lalduhoma hian nimina ZPM pisaa inkhawmah thu sawiin, "Kumin MLA inthlan lo awm turah hian tu mah thawhpui kan tum lo a, lo tum pawh ni ila mi dang sawisak kan ngai lo. Delhi chaknaa innghah kan tum lo a, kan innghahna chu Pathian a ni," a ti a; MP inthlan leh hunah hian BJP paih a nih theih nan theihtawp chhuah a ṭul thu a sawi a ni.

ZPM Leader chuan, party dangte'n ZPM an beihnate chu belhchian dâwl lo a nih thu a sawi a, "Tunlai hian kan party leh BJP min sawi zawm tum tlat an awm. India ramah Congress an sorkar rei tawh a, kalphung thar zuar ve tho Pu Modi-a duhna a lo lian ta hle a, Mizoramah pawh MP thlannaah Congress ni lo zawng ṭangrualin Pu Robert Romawia kan candidate a, chu chu BJP nena kan thawhhona hmasa ber a ni," a ti.

Sawm an nih angin ZNP chu NDA-ah an tel ve thu sawiin Duhoma chuan, "An chêt dan hrang hrang kan thlirin keini Mizo Kristian leh minority-te tan tel reng chi-ah kan ngai lo a, kum 2016 khan thuchhuah siamin NDA kan zawmna chu kan titawp ta a ni," a ti a; national party zawm an duh tawh lo a, tualṭo party nih mai a tâwk an tih thu leh Mizoram tan a hlu bera an hriat thu a sawi.

Lalduhoma chuan, MNF-in NDA an zawm mek tih sawiin, "Kan chhuah hun kha an lo châng rân emaw tih tur a ni a, vawiin thlengin an la tel ta reng a ni. Citizenship Amendment Act kha MNF-te nen kan do tlang a, mahse, an MP chuan a thláwp zawngin thu a sawi leh thung si," a ti.

ZPM Leader chuan, ZPM party aṭanga chhuakte chungchang sawiin, "Kan hruaitu duhawm tak tak pahnih/pathumin min chhuahsan a, kan ui hle a, candidate atan pawha kan iai loh tak tak an ni. Kan bâwm a tâwt si avangin an beisei ang kan tihsak thei lo," a ti a; ZPM chhuahsantute chu an awmna party tharah kalphung thar hmang zel turin a chah.

Lalduhoma chuan, tun hnaiah Guwahati-a a zin chungchang sawiin, "BJP nen an zuk inhmu a, car varah a chuang tih te, Delson-a a kalpui an ti thul. Fate buaipuia kan zinna thu hi Congress party hi ka hrilh zelna chhan tur ka hre lo a, BJP chungchang an hriat duh chuan an thawhpui MNF-te hi zawt mai se tih hi ka ràwn duh a ni," a ti.

ZPM working president K Sapdanga nena an chungchang sawiin Duhoma chuan, "Pu Sapa nen kan inkar lah an sawi châwl thei lo a, an sawi nasat poh leh kan inngeih tial tial a, anni sawi ṭhen theih kan ni lo. Kum 2018 inthlan zawh aṭanga an sawi tawh hi lo la sawi zel se, keini erawh kan lo inpumkhat tual tual dawn a ni," a ti.

ZPM Leader chuan Uniform Civil Code chungchangah, "MNF hian sawisel reng siin a ṭan zawngin vote an thlâk leh mai ang tih kan hlau hle," a ti. India rama eptu party-te BJP a sorkar zel lohna tura an kal khawm chungchangah, "Mipui nuai 40 hmaah thu ka sawi a, nuai 40 an tling lo ang tiin kan lo buai hle a, India rama news reporter lian zawng zawngin nuai 40 vel kal khawm an ni tiin an chhuah a ni," a ti bawk.