Voluntary Blood Donation Day hmang

Nimin October 1 khan National Voluntary Blood Donation Day a ni a, thupui chu 'Let’s donate blood voluntarily and contribute to the fight against Corona' tih a ni. He ní hi Mizoram hmun ṭhenkhatah hman niin, thisen pe ṭhate hnenah chawimawina an hlân.

National Voluntary Blood Donation Day hi Association for Voluntary Blood Donation (AVBD), Lunglei leh MSACS buatsaihin Lunglei Sub-Hqrs YMA conference hall-ah hman a ni a, Lunglei AVBD president Dr SR Ngurchamliana'n kaihruaiin, district bawrhsap V Lalsangliana khuallian a ni.

V Lalsangliana chuan, sum leh pai séng loa mite ṭanpui theihna hlu ber chu a thlâwna thisen pek a ni tih sawiin, YMA, zirna-in, kohhran ṭhalaite leh pawl dangte'n thisen pek an uar chu lawmawm a tih thu a sawi a, "Thisen pek hi Mizo tlawmngaihna dik tak a ni a, a Mizo a, a Kristian bawk a ni. Thisen kan mamawh aia tam kanneih hi ui loin mi dangte i pe zel ang u," a ti.

Lunglei Civil Hospital (LCH) blood bank officer Dr Lucy Ramhmingliani Renthlei tarlan danin, January-December, 2019 chhung khan LCH-ah thisen unit 2,597 pek niin, chu'ng zinga unit 2,303 (88.67%) chu voluntary donationa ni. Kuminah January-August chhungin unit 1,604 an dawng tawh a, chu'ng zinga unit 1,510 (94.13%) chu voluntary donation a ni.

Lungleia Voluntary Blood Donation Day hmannaah hian Lunglei district-a thisen pe ṭha pawl leh mimal hnenah chawimawina hlan a ni a; mimal bikah, mi 13 hnenah chawimawina hlan a ni.

Voluntary Blood Donation Day hi Lawngtlaiah pawh AVBD leh District Hospital Blood Bank huaihawtin BCM Kohhran Hall, College Vengah hman a ni. Thu sawitu Blood Bank officer Dr Beiparysa K chuan, thisen pek chu nun chhanhimna pawimawh tak a nih thu sawiin, "Thisen pe thei lote pawh mi dangte'n thisen an pek theihna tura fuih a, zirtirtu kan ni thei. A thlawna thisen pek uar sauh sauh a ṭul a ni," a ti.

Report-a a lan danin, kumin January-September chhungin Lawngtlai District Hospital Blood Bank-ah thisen unit 923 pek a ni tawh a, chu'ng zinga unit 779 (84.40%) chu voluntary donation a ni. Blood donation camp ṭum 28 buatsaih tawh aṭangin thisen unit 720 pek a ni tawh.

Lawngtlaia NVBDD hmannaah hian nikum October 1 leh kumin October 1 inkara thisen pe tam mi pathum - Elvis Lalthangzuala, Ramdinsanga leh Lalhlimpuia Hnialum-te hnenah chawimawina thuchei hlan a ni.