ISPAT chungchang Lalduhoma sawiin belhchian a dâwl lo hle - MPCC Media

MPCC Media department hotute chuan nimin khan Aizawl Press Club-ah thuthar thehdarhtute an kâwm a; Lengte rama ISPAT Industry chungchanga ZPM leader Lalduhoma thu sawiin belhchian a dâwl lo hle niin an sawi.

MPCC Media chairman Dr Lallianchhunga sawi danin, Lalduhoma hian October 29, 2018 khan Khawzawl Zaingen YMA Hall-ah 'Vai thirchhe siamna Lengtea ISPAT Industry khu cheng vbc. 100 tam tak sorkarin loan a pe a, chutah chuan Congress sorkar hi guarantor-ah a ṭang. Guarantor-a ṭang tih awmzia chu ISPAT company khuan a loan lak a rulh theih loh chuan Congress sorkarin a rulhsak ang tihna a ni,' a ti.

MPCC Legal Cell-in RTI Act hmanga an dilna July 4, 2023-a Commerce & Industries department-in a chhannaa a lan danin, Commerce & Industries-in ISPAT Industry hnenah loan pek a nei lo a, guarantor-ah pawh a ṭang lo, tih a ni.

Dr Lallianchhunga chuan, ISPAT Industry-in loan an dilnaah Industry Director chu guarantor-ah a ṭang lo tih leh Mizoram sorkar pawh guarantor-ah a ṭang lo tih chu February 21, 2012-a sorkar thuchhuahah tarlan a ni tawh tih sawiin, "April 27, 2016-a sorkar thuchhuahah ISPAT Industry hian an bul ṭan nan NEDFI leh SBI, Guwahati aṭangin loan cheng vbc. 20 an lak thu tarlan a ni," a ti.

MPCC Media Chairman chuan, Mizoram sorkarin cheng vbc. 100 tam tak loan pe anga a sawi chu dâwt chiang tak a nih thu sawiin, "Commerce & Industries hi Mizorama thil siamna hmun (industry) zawng zawng enkawltu a nih avangin an hriatpui lohin Pu Lalduhoma thil sawi hi a thleng thei lo," a ti a; sorkar thuchhuahin chiang taka a tarlan tawh mipuiin an theihnghilh tawh ringin Lalduhoma'n thu belhchian dâwl lo a sawi em ni, tih chu an zawhna a nih thu a sawi.

MPCC Media tarlan danin, kum li liam taa sawi pawh ni se dâwt a nihna a la bo loh avang leh Lalduhoma thu sawi video chu Youtube-ah vawrh darh a la nih zel avangin thu dik mipui hriata puan ṭulin an hria a ni.

ZPM chief ministerial candidate Lalduhoma chu finfiah leh nghal mai theih angah pawh chincháng hre lo zawk mipui hnena thu belhchian dâwl lo sawi hreh loah puhin MPCC Media chuan, "Mizoram tana pa nih tling a nih lohzia a lantirnaah kan ngai. Mizoram CM nih tum ve tan thu belhchian dâwl loa mipui bàwl vak vak hi thil tih àwm leh mawi pawh a ni lo," an ti a; finfiah tlak thu belhchian dâwl chauh mipui hnenah sawi tawh turin an chah a ni.