UCC do turin Mizorama party zingah MNF baka ṭha a awm lo - MNF Adviser

MNF adviser Prof. F Lalnunmawia, MLA chuan, Uniform Civil Code (UCC) do turin Mizorama political party zingah MNF baka ṭha a awm lo a, eptu party-te'n sorkar beihna tur lian tham an nei lo niin a sawi.

Prof. F Lalnunmawia hian nimin khan Mizo Hnam Runa inkhawmah thu sawiin, UCC duh lohna Assembly session-ah February 14, 2023 khan pawm a ni a, Chief Minister pawhin sorkar laipuiah UCC duh loh thu ziakin a thlen tawh tih a sawi a, "Kan MP pahnihin UCC an dodal thu an au chhuahpui mek bawk. Hetiang taka Mizoram leh Mizote himna atana ṭang ngam leh a ṭul huna sorkar laipui dodal ngam MNF ang hi party dang an awm lo," a ti.

MNF sorkarin Citizens Amendment Bill theihtawpin an do nia sawiin MNF Adviser chuan, "CAB kan duh loh thu Assembly session-ah March 20, 2019-ah pass a ni a, October 5, 2019 khan CM Pu Zoramthanga’n hmaichhanah Union HM Pu Amit Shah a hrilh. Kan MP pahnih pawhin an duh loh thu an au chhuahpui bawk," a ti a; CAB chuan hmarchhak state-te a huam ve ta lo niin a sawi.