PMAY-HFA ṭanpuina inhrilhfiah

Urban Development and Poverty Alleviation (UDPA) department chuan nimin khan Dawrpui Multipurpose Hall, Electric Veng YMA Hall leh Vaivakawn YMA Hall-ah PMAY-HFA (Urban) Mission hnuaia mirethei in sak ṭanpuina dawng tur zinga chhungkaw 1,165-te tan hmalak dan tur hrilhfiahna an buatsaih.

Sorkar thuchhuah tarlan danin, PMAY-HFA (Urban) hnuaiah hian Mizorama khawpui 23-ah in sak ṭanpuina dawng tur chhungkua 37,450 an awm a, Rs 1,50,000 ṭheuh an dawng dawn a, instalment thuma pek tur a ni.

Chhungkua 21,731-in first instalment Rs 60,000 an dawng tawh a, la dawng lo chhungkua 15,719-te chu August 2023 ral hmain first instalment pek tum a ni. Kum 2024 ral hmain ṭanpuina dawng turte hnenah pe kim vek hman tura hmalak mek a ni bawk.