Manipur inkahnaa hliam Shillong thlenpui

July 7, 2023-a Kangvai, Churachanpur district, Manipur-a Zo hnahthlakte leh Meitei-te inkahnaa hliam Nehtinsat Haokip (21), New Zalenphai chu Central YMA ruahmanna angin NEIGRIHMS, Shillong thlenpui a ni.

CYMA hruaitute hnen aṭanga thu dawn danin, Kangvaia inkahnaah hian Kangvai aṭanga km. 1 vela hláa awm Zalenphai khuaa mipa hoin Kangvai mite an pui a, Nehtinsat Haokip chuan Meitei silaimu tawng fuhin a hliam a ni.

Nehtinsat Haokip chu Lamka damdawi-inah enkawl niin, a dàr veilam, a áwm báwrah leh a chuap veilam sirah silaimu a táng tih hmuh a ni. Indigenous Tribals Leader Forum (ITLF) leh CYMA ruahman angin July 13 khan Aizawl phurh thlen a ni a, Civil Hospital, Aizawlah enkawl zui a ni.

Hmunpui zawk pan tura doctor-te'n an ràwn angin CYMA ruahman angin NEIGRIHMS panpui a ni a, CYMA chuan Nehtinsat Haokip leh amah hruaitu chu thlawhna ticket an laksak bakah, Rs 30,000 an pài a; nimin khan NEIGRIHMS thlenpui niin, Shil-long Group YMA-in an lo buaipui zui a ni.