Satellite Wildlife Rescue Centre dinna tur hmunhma enfiah a ni

Environment, Forest & Climate Change (EFCC) minister TJ Lalnuntluanga chuan nimin khan Champhai Tlangsam ram, Dumpui tlanga ramri kâna ramsa tawlhrûkte enkawlna atana ruahman Satellite Wildlife Rescue Centre dinna tur hmunhma leh a panna kawngte a enfiah a; Centre dinna tur project chu sorkar laipuiin a pawm tawh thu a sawi.

TJ Lalnuntluanga chuan, Champhai district kaltlangin dan loa nungcha tawlhrûk tam tak man a nih tawh thu a sawi a, "Central Zoo Authority of India inkaihhruainain sahuan pangngaia dah luh mai a remti lo a, hei vang hian court rorelna leh enforcement agency dangte'n nungcha tawlhruk an mante chu dah maina tur a awm loh avangin an awmna tur bik Wildlife Rescue Centre din tuma hmalak a ni," a ti.

Satellite Wildlife Rescue Centre dinna tur hian Tlangsam khaw bula EFCC department hnuaia awm Dumpui tlang ram hectare 20 vela zau ruahman a ni a; Centre dinna tur project-te sorkar laipuiin a pawm tawh thu leh sum an rawn pek thuai a nih theih nan August 2023 tirah technical committee paltlang tura buatsaih tum a nih thu Minister chuan a sawi.

EFCC Minister hi Champhai district forest officer Lalduhthlana, IPRO Dr Lallawmkima, PWD junior engineer Lallianmawia leh EFCC department official dangte leh khawtlang hruaitute'n an ṭawiawm a ni.