Mizoramin mipui nat ruala na ve ṭhin ram hruaitu a mamawh - Dr Vanlalthlana

ZPM Legislature Party secretary Dr Vanlalthlana chuan, Mizoramin mipui nat ruala na ve ṭhin ram hruaitu a mamawh a, mipui nat laia sum leh pai tuaka hmanhlel ram hruaitu a mamawh loh thu a sawi.

Dr Vanlalthlana hian nimina ZPM pisaa inkhawmah thu sawiin, "Kan ram hruaitute hian power-a intodelh hi an buaipui tak tak em tih kan zawt a, an thawk lo kan ti lo a, an tizùzî tih erawh kan sawi. Mipuite an nat ruala na ve ṭhin ram hruaitu kan mamawh a, mipuite nat laia in leh lo ṭha, sum leh pai tuaka hmanhlel ram hruaitu hi he ram hian a mamawh tawh lo," a ti.

ZPM MLA sawi danin, Brig. T Sailo-in Bairabi Hydel Project atana hma a lak chu a hnua mite'n an tizuzi a, kum 1998 ministry-ah MPC lam aṭanga Power Minister-in a tharthawh leh chu thawhona a tawp hnuah a zuzi leh a, tunah Tuivai Hydel project pawh a zuzi tawh. Mizoram sorkarin kawlphetha leina atan kum khatah cheng vbc. 400 vel a hmang a, chu chu sorkar department 47 zinga department 40-te budget aiin a tam.

Sorkar tawhte hnenah power buaipui tak tak an tum em tih chu an zawhna a ni reng tih sawiin Vanlalthlana chuan, "Power hmanga intodelhna tur tihzûzî a nih ṭhin dante kan sawi hian engmah ti lo angin kan sawi lo, an tizuzi a ni tih erawh kan sawi a ni," a ti.

Dr Vanlalthlana chuan, thingtlanga mi harsa zawkte dinhmun chungchang sawiin, "An dinhmun siam tumin hma an la duh miah lo hi rilru a ná. Mipui kan ṭan rual a ngai. Kan khingpuite hian inthlan dawnah ram hruai dan tur an hre thar ṭhin. ZPM hian kan tih theih tur chin bâk kan sawi dawn lo a, mipuite'n chance min pek ve erawh a ngai," a ti a; sikul tlabal a tam thu leh sorkar sikulte chu sorkar hotute'n an fate luhna atan an duh bik loh thu a sawi.

ZPM chu mipui tibeidawng zawnga chhiatna lai chauh sawi ṭhinah puh an ni fo tih sawiin Vanlalthlana chuan, "Keini chuan beiseina thar nei turin mipui kan ngen zawk. Kan ram dinhmun te, kan sorkar dinhmun kan sawi hian beiseina a la awmzia kan sawi ṭhin a, kan sawi fo tur a ni," a ti.

Inkhawmah hian an party zawm tharte ZPM vice president Rev.Dr K Thanzaua'n a lawm lut niin ZPM thuchhuah chuan a tarlang.