NDA meeting-a tel turin CM/MNF President phût

Congress ṭhalai, Mizoram Pradesh Youth Congress Committee (MPYCC) chuan chief minister Zoramthanga chu July 18, 2023-a prime minister Narendra Modi hoa Delhi-a National Democratic Alliance (NDA) meeting-ah tel ngei ngei turin an phût.

MPYCC chuan thuchhuah siamin, MNF party chu NDA meeting-ah tel ngei turin an phût a, "Manipur-a kan unau Zo fate'n harsatna rapthlak tak an tawh lai leh awmze nei taka Kristiante biak-in 250 chuang suasama hâl chhiat a nih tawh hnuah pawh BJP kaihhruai Central-a NDA sorkar aṭanga an thlavâng hauhna eng mah a la awm lo hi MNF president Pu Zoramthanga hian na taka a dem kan phût," an ti.

MPYCC chuan, NDA meeting chu MNF President-in Manipur-a Zo hnahthlakte leh Kristiante thlavâng hauhna rem_changah hmang ngei se an duh thu an tarlang a; Manipur-ah remna leh muanna a awm theih nan a rang thei ang bera hma la tura Prime Minister nawr turin an phût bawk.