MPC leh PRISM inchhûnfin hunah Party mala sorkar an tum dawn

Political party pahnih - Mizoram People's Conference (MPC) leh PRISM hruaitute chuan October 6, 2020 hian party pakhatah an inchhûnfin dawn tih an puang a, "Party mala sorkarna siam ngei kan tum dawn," an ti.

MPC leh PRISM hruaitute chuan nimin khan Aizawl Press Club-ah thuthar thehdarhtute an kâwm a; MPC president Lalhmangaih Sailo chuan, political leh economic ideology, policy leh programme-ah PRISM nen phîr ang mai an nih thu sawiin, "PRISM hi NGO an nih lai pawhin ramri chungchang a ni emaw, tuikhuah chungchang a ni emaw, tum leh duh thuhmun thlap ang maiin kan kalho fo tawh," a ti.

Lalhmangaiha Sailo chuan, Mizoram tluchhe mek tundin a nih theih nan party pakhata inchhûnfin mai tura ngenna a tam nia sawiin, "Ngenna tihhlawhtlin a ni thei tur hi ka lawm tak zet. Ram tana ṭhahnem ngai tak takte chungah lawmthu ka sawi," a ti a; MPC dintu Brig. T Sailo (L) policy leh programme 'Six Basic Needs' chu an policy pui ber a nih tur thu a sawi.

Zawhna chhangin Lalhma­ngaiha Sailo chuan, political party dang nen ni lo, party mal ngeia sorkarna siam turin theih­tawp an chhuah tur thu a sawi.

PRISM president Vanlalruata chuan, NGO an nih laia hma an lakna ṭhinah Brig. T Sailo hmalak tam hmanzia leh chhunzawm a châkawmzia an hriat thu a sawi a, "Hmun kilkhâwr zawka ngaihah pawh kal ila, Pu Ṭhena hmalak tawhna leh chhunzawmna a awm loh avanga ram hmasawn lohna a tamziate an lo sawi zel a ni," a ti.

MPC leh PRISM hi October 6, 2020-ah an inchhûnfin dawn a, an party hming tur leh hruaitu turte hming an puang nghal ang.