KHAWTHLIR

MRB Chairman

Mizoram Rural Bank (MRB) chairman thar Sheryl L Vanchhong chuan nimin khan MRB Chairman pisa a luah ṭan a, chairman hna hi deputation-in kum thum chhung a chelh tura ngaih a ni. MRB hi September 1983-ah Regional Rural Banks Act, 1976 hnuaiah din a ni a, branch 102-ah thawktu 475 an awm mek. MRB-a shareholder-te chu sorkar laipui 50%, Mizoram sorkar 15% leh SBI 35% an ni.

Demonstration van

Aizawl district election officer Dr Lalhriatzuali Ralte, bawrhsap chuan nimin khan Demonstration Mobile Van a vailiam. Demonstration mobile van hi kumina MLA inthlanpui awm tura inbuatsaihna atan vote thlak chungchanga mipui zirtirna leh vote thlak dan zir chhinna tur a ni a, Aizawl district-a polling station zawng zawngah kal kualpui tum a ni.

Award dil theih

Ministry of Women & Child Development chuan Pradhan Mantri Rashtriya Bal Puruskar a hlan ṭhin dil hun a hawng mek a, August 31, 2023 thleng rawtna thehluh theih niin, online hmangin awards.gov.in ah dil theih a ni. Kum 18 aia upa lote zinga mi dang chhan chhuaktu, mi dangte tana entawn tlak te, infiamna, vantlang rawngbawlna, science & technology, environtment, arts & culture leh thil thar chìn chhuah lama entawn tlakte hnenah award hi hlan ṭhin a ni.

Sarang enfiah

Lunglei District Enforcement Squad for Single Use Plastic Free chuan nimin khan Lunglei Chanmari Vengah hman khat daih sarâng hmang an awm leh awm loh dawr hrang hrang an enfiah a, dawr tam zawkin an la hmang tih an hmu. Hman khat daih sarâng hmangtu dawrte chu dan zâwm turin an chah a; endik leh hunah man an nih chuan pawisa chawi an inhuam tih an intiamtir a ni.

Tanpuina hlan

Mission Foundation Movement chuan nimin khan Tuirial Refugee Camp-a Myanmar ráltlânte hnenah ṭanpuina - buhfai ip 15, dailuah ip li, têl báwm ruk, bekang sa ip li, alu ip nga leh chhang báwm nga an pe. Camp-ah hian mi 78 an awm mek a, an zinga 25 chu naupang niin, kum 70 chung lam pathum an awm. Ṭanpuina hi MFM director R Vanlalzauva leh a thawhpuite'n an hlàn a ni.