Doctor sawnna thupek sût turin phût

Mizo Zirlai Pawl (MZP) Headquarters, Mamit chuan thuchhuah siamin, Mamit District Hospital-a dental surgeon Dr Zonuntluangi, thlaktu tur dah loa Aizawl Civil Hospital (ACH)-a sawn a ni chu an dem thu an tarlang a, thlaktu tur dah nghal a nih dawn loh chuan transfer order sût turin sorkar an phût.

Mamit MZP chuan, District Hospital aṭanga ACH-a Dr Zonuntluangi sawnna thupek chu September 25, 2020 khan tihchhuah a ni tih sawiin, "Thlaktu awm loin ACH-ah sawn a ni hi pawi kan ti tak zet zet a, Mamit district mipui hriselna ngaih pawimawh lohna leh mipuite zah lohnaah kan ngai," an ti.

Mamit MZP chuan, Mamit District Hospital-ah doctor an tlem thu sawiin, tuna a awm mekte chu thlâktu awm lo chuan sawn chhuak tawh lo turin sorkar an ngen a; "Dr Zonuntluangi hian District Hospital a chhuahsan hmaa a thlaktu tur min dahsak ngei turin sorkar kan ngen a, min dahsak thei lo a nih chuan transfer order hi cancel mai turin sorkar kan ngen tak meuh a ni," an ti. Anaesthetist, Ortho doctor, ENT doctor leh radiologist-te dah belh turin sorkar an ngen nghal bawk.