Champhai tana hmachhawp thlirho

Clean, Beautiful and Healthy Champhai Town Committee chu nimin khan Champhai North bialtu MLA Dr ZR Thiamsanga hoin DC conference hall-ah an ṭhukhawm a, an hmalak tawhna leh hmachhawpte an thlirho.

Dr ZR Thiamsanga chuan, Champhai district chu district lian leh hlun, a chhunga chêngte pawh Zo nun ze mawi chhawm nunga nunpui tlattute an nih thu sawiin, "Khawpui fai zawk, thianghlim leh hrisel tak din a nih theih nnahmalak mek zel a ni a, kan zavaia ṭan rual a ṭul dawn hle," a ti a; Champhai mipui chu khawpui thar din tura ṭan rualpuiah a sáwm.

Champhai DC Maria CT Zuali pawhin thu sawiin, "Faina leh hriselna ngaih pawimawh a ṭul. Mahni ṭheuhah faina nun bul kan ṭan a ngai. Kawngpui nêk lutuka in sak, in sakna bungraw chhawp leh hnathawh nana kawngpui hman ṭhinte hi a veiawm," a ti a; VC-te chu an rorelna chhung ṭheuhah dan ṭha taka kengkawh turin a chah.

Ṭhutkhawmah hian Clean, Beautiful and Healthy Champhai Town Committee chu sub-committee pathumah an ṭhen a, member turte an ruat nghal. Sub-committee-te chuan Village Sanitation Committee-te hmalakna an enpui ṭhin dawn a ni.