ZPM-in MLA candidate tur an puang; 'Duh taka kan thlante an ni' - ZPM President

Zoram Peoples Movement (ZPM) chuan kumina Mizoram State Legislative Assembly inthlanpuia an candidate turte nimin khan an puang a, candidate tur zingah hmeichhia pahnih an tel. ZPM president Lalliansawta chuan, an candidate turte chu duh tak leh beiseina sang tak nena an thlan chhuahte an nih thu a sawi.

ZPM Nomination Committee chu nimin khan an ṭhu­khawm a, Nomination Com­mi­ttee secretary Dr Kenneth Chawngliana'n candidate turte puan chungchanga hriattirna nimin khan a tichhuak. Assem­­bly bial 40 zinga 39-a an candidate tur an puang a, Tuichawng biala candidate tur erawh an puang tel lo.

ZPM candidate tur puan tawh zingah hmeichhia pahnih - Lalrinpuii - Lunglei East leh Baryl Vanneihsangi - Aizawl South-III an tel a, mi 37 dang chu mipa an ni. Tuna ZPM MLA ni mek mi parukte chu an bial ngaiah ṭheuh an ding dawn a; candidate tur mi 40 zinga mi 16 chu inthlan hmasa lama candidate lo ni tawhte an ni a, mi 23 chu candidate la ni ngai lo an ni thung.

ZPM president Lalliansawta chuan Vanglaini palai zawhna chhángin, an candidate turte chu duh taka an thlan an nih thu a sawi a, "Duh tak leh beiseina sang taka kan thlante an ni. ZPM chuan theihtawpin kan ṭawiawm dawn a, an tlin ngei theih nan ṭan kan la dawn. Ram siamna hmanrua an nih ngei kan beisei," a ti.

Lalliansawta chuan, MLA paruk an nei sa tih sawiin, "Theitawpa fimkhurin bial vil tur kan ruat a, candidate chang lo tam fé an awm lo thei lo," a ti a; thawhhona ṭha tak an neih chhoh zel a beisei thu a sawi a ni.