Aizawlah Chheihlàm Intihsiak buatsaih

Mizo Cultural Artistes' Association chuan kum 25 an tlin lawm nan Art & Culture department nen ṭang dunin Chheihlàm Intihsiak an buatsaih a; C Laldintluanga & PC Lalremsangi, East Lungdar leh Vanlalrinnunga, College Veng & Jenny Lalnunthari, Dinthar te pakhatna an ni. 

Mizo Cultural Artistes' Association (MCAA) chuan kum 25 an tlin lawm nan Art & Culture department nen ṭang dunin Chheihlàm Intihsiak an buatsaih.

Intihsiakna hi hlawm hnih - kum 16 hnuai lam leh kum 17 chung lamah ṭhen a ni a, hla rang leh muang hmangin final-ah intihsiak a ni. Kum 16 hnuai lam inelnaah pakhatnain Rs 10,000, pahnihnain Rs 7,000 leh pathumnain Rs 5,000 an dawng a; kum 17 chung lam intihsiakah pakhatnain Rs 30,000, pahnihnain Rs 20,000 leh pathumnain Rs 15,000 an dawng.

Mipa lâm thiam bera thlante chu kum 16 hnuai lamah F Lalhruaitluanga, Saihnuni Sailo Memorial School leh kum 17 chung lamah Vanlalrinnunga, College Veng, Aizawl an ni a; hmeichhia lâm thiam bera thlante chu kum 16 hnuai lamah Lalhmangaihsangi, Mamit Dinthar leh kum 17 chung lamah Jenny Lalnunthari, Dinthar, Aizawl te an ni.

Chheihlàm Intihsiak hi nimin khan Vanapa Hall-ah khàr a ni a, Art & Culture minister R Lalzirliana khuallian a ni. Minister chuan, Mizo hnam làm leh zaite chu Mizote tipumkhattu leh hnama chian lehzualna tura pawimawh a nih thu a sawi.