Chite Rehabilitation Centre-a ram pek LSC/pass tihfel dan tur sawiho a ni

Land Revenue & Settlement (LRS) minister Lalruatkima kaihhruaiin nimin khan a pisaah sorkar hotute'n Aizawla lei min leh tawlh vanga in leh lo chánte hnena Chite Rehabilitation Centre, Ramhlun Sports Complex chhunga sorkarin in hmun a pek tawh chhungkaw 80 chuangte land settlement certificate (LSC) tihfel dan tur an ngaihtuah.

Chite Rehabilitation Centre, Ramhlun Sports Complex hi sorkarin mimal hnen aṭanga a lei a ni a, house site 100 ruahman a nih bakah, thlànmual, health sub-centre leh vangtlang hmun turte zuah a ni.

Kum 2013-a Laipuitlang leimin, kum 2014-a Ramhlun Sports Complex leimin leh tun hnaia Hunthar Veng leimin vanga in leh lo chán vek, chènna in nei lo mi 80 chuang hnenah Chite Rehabilitation Centre-ah in sakna tur hmun pek a ni. In hmun pek zinga mi eng emaw zatin in leh lo din tawh mah se, ram neitu nihna LSC/house pass tihfel a la ni lo.

LRS Minister chuan, Chite Rehabilitation Centre-a sorkarin in chánte tana in sakna tur ram a pek dan a sawifiah a, "LSC emaw, house pass emaw tihfel a la nih loh avangin hmun neitute'n loan-te pawh an la thei lo a, chu mai bakah, sorkar pawhin chhiah (land revenue) a chán zel a, chuvangin, an LSC tur tihfel vat a ṭul," a ti.

Ṭhutkhawmah hian, in hmun pekte chu LSC tihfelsak a nih thei nan Aizawl DC hmalakna hnuaiah thil ṭulte tihfel vat ni se, an ti a; DC-in a tihfel hnuah sorkarin LSC pek dan turah hriattirna chhuahin tihfel ni se, an ti bawk.