Champhaia inthlan inbuatsaih dan CEO Madhup Vyas-a'n a enfiah

Mizoram chief electoral officer (CEO) Madhup Vyas chuan nimin khan Champhai a tlawh a, kumina MLA inthlanpui awm tura Champhai district inbuatsaih dan a endik. CEO chuan, kum 2018 MLA inthlanpuiah Mizorama vote tla chawhrual aiin Champhai district-a vote tla zat percentage a tlem thu leh ṭan lak a ngaih thu a sawi.

DRDO conference hall-a district hotute nen an inkawmnaah Madhup Vyas chuan, Mizoramah inthlanna muanawm leh felfai tak neih a ni tawh ṭhin tih a sawi a, "Ṭhahnemngai taka kan ṭan rual zel a pawimawh. Khawzawl district chhunga Champhai North Assembly constituency huam tel polling station-te pawh la kutkena ngaihven zel a ngai," a ti.

Chief Electoral Officer hian DC pisaa electronic voting machine dahna strong room te, vote chhiarna tur counting centre leh inthlanna kaihhnawiha mamawh tur hrang hranga ruahmanna kalpuite a enfiah. Champhai Kahrawt, Venglai leh Bethel Venga polling station pali a tlawh bawk a; tui, kawlphetha, wheelchair hmangte kalna tur ramp, inthiarna leh ṭul dangte dinhmun a endik a ni.

Champhai district election officer James Lalrinchhana tarlan danin, January 13, 2023-a Final Electoral Roll tlangzarhah Champhai district-a MLA bial pathum - Champhai North, Champhai South leh East Tuipuiah voter 56,362 an awm. Polling station 84 a awm a, chu'ng zinga Champhai North biala mi PS paruk chu Khawzawl district-a awm a ni.