ZPM Ṭhalai Lokayukta-ah an zualko
ZPM Ṭhalai chuan, Reiek Tourist Resort tihhmasawnna atana sum ruahman nuai 680 chuang chu mi ṭhenkhatin sum siamna atan an hmang nia an hriat avang leh sum hman leh hnathawh danah dik lo a awma an hriat avangin chhui tura ngenna nimin khan Lokayukta-ah an thehlut. Hnathawh dan sawifiah turin Tourism minister Robert Romawia Royte an phût bawk.
Tourism department hnuaia Reiek tlanga hnathawhte chu July 14, 2023 khan an enfiah tih an tarlang a; chhui chiang tura Mizoram Lokayukta ngenna hi ZPM Ṭhalai vice president Zoramchhana Sailo hmingin an thehlut a ni.
ZPM Ṭhalai chuan, cheng nuai 680 chuang sên a ni chungin hmasawnna tur thil thar hmuh tur a la awm fumfê lo niin an sawi a, "Sum ruahmante mahni hlâwkna atan leh mahni worker-te pawisa siamna atan maia hman nia a lang hi pawi kan ti hle. Thil dik lo titute hrem an nih ngei kan duh," an ti.
ZPM Ṭhalai tarlan danin, Reiek tlang tihchangtlunna atan 'Component 1 of Development of Immediately Required Infrastructure for Tourist Development at Reiek Tlang' tihah sum nuai 560 dah a ni a, hna hmutu chu DJ Consultancy Services, Peter Street, Sikulpuikawn niin, restricted tender hmangin hna pek a ni. Departmental work leh PWD Poject Division-I aṭanga hnathawhna sum cheng nuai 114.4 a awm bawk.
Reiek tlang cheina atana sum ruahman (total estimate) chu nuai 560 a nih laiin, RTI Act tlawhchhana zawhna chhannaah, DJ Consultancy-in pawisa an hmannate chu nuai 447.22 a nih thu leh nuai 82.78 hmanna tarlan a nih loh thu ZPM ṭhalaite chuan an tarlang.
DJ Consultancy Service hna chu kum 2020-ah thawh ṭan a ni a, thla 18 chhung, December 2021 ral hmaa zawh tur a nih laiin an zo hman lo a, hun an dil belh angin thla 13 dang pek belh a ni a, January 2023-a zawh tur a ni. Hna chu work component 12-ah ṭhen a ni a, sum ruahman leh hnathawhte a inmil lo hleah an ngai a ni.
ZPM Ṭhalai chuan, cheng nuai 18.94 hmanna 'Construction of Parking Approach' leh nuai 95.61 hmanna 'Repair and Renovation of Amphitheather' te chu an hmu zo lo tih an sawi. Main gate siamna atan cheng nuai 53.07 leh parking area siamna atan nuai 148.70 dahte chu hnathawh nen a inmil lo hle nia sawiin ZPM ṭhalaite chuan, "Thil àwm lo lutuk leh sum siamna dik takah kan ngai. Parking area pavement chu rod tel loa chhûn a ni," an ti.
ZPM ṬHALAI TARLAN DANGTE
▶ Kum 2020-2023 chhungin cheng nuai 560 ruahman bakah, kum 2022-ah department work-in cheng nuai 81.68 man sorkarin a ruahman leh a, hna thawh tur (work component) chi kua a awm.
▶ Pindan pahnih zel awmna cottage 101 & 102, cottage 103 & 104 leh cottage 105 & 106 siamna atan cheng nuai 10.56 ṭheuh sèn a ni. Hnathawh leh sum sen a inmil lo hle.
▶ Deluxe-I thawm ṭhatna atan Rs 4,90,000 ruahman a ni a, rawng hnawih thar bâk thil thar hmuh tur a awm lo.
▶ Deluxe-II thawm ṭhatna atan Rs 13,05,000 ruahman a ni a, kawngkhar pahnih siam, rawng hnawih leh LED bulb thlakte chauh tih a ni.
▶ Convention Hall thawm ṭhat nan nuai 16.08 dah a nih laiin, ceilling pawp hmun hniha bel leh bual-in bang (partition) ft. 4 bial vel hmun hniha pin leh rawng hnawih ṭhat tih a ni.
▶ Kum 2022-ah vêk khan 'Repair and Renovation of Reiek Tourist Lodge & Zokhua' atan PWD Project Division-I aṭangin cheng nuai 32.48 ruahman leh a ni.
▶ Repair & renovation of cottage 101 & 102, 103 & 104, 107 & 108, 109 & 110 thawm ṭhatna atan cottage pakhatah cheng nuai 3.2 zel, a vaiin cottage pali atan nuai 12.8 ruahman a ni a; sum hmanna hmuh tur a awm lo.
▶ Zokhua chei ṭhatna atan cheng nuai 10 chuang dah a ni a, hnathawh mumal hmuh tur a awm lo.
▶ Cafeteria atan cheng nuai 2.65 a ni a, Rest Hut Roof siamna atan nuai 2 dáwn sên a ni a; sum sen leh hnathawh a inàwm lo hle.