Sorkar kum liam taah councillor-te'n an fund dawn tur an dawng kim lo

Aizawl Municipal Corporation (AMC) councillor/corporator-te chuan sorkar kum liam ta, 2022-23 chhunga ward fund an dawn tur zata budget-a ruahman an dawng kim lo.

Thu dawn danin, kum 2022-23 khan AMC Board of Councillor-in budget an pawmah councillor-te ward fund tur chu Property Tax return aṭanga hmuh tur Rs 10,00,000 leh General Ward fund aṭanga hmuh tur Rs 20,00,000 a ni a, a vaiin Rs 30,00,000 a ni. Hetih lai hian, councillor-te chuan nikum chhung khan an dawn tur zatve, Rs 15,00,000 chiah an dawng a ni.

Councillor/corporator-te hian Property Tax return aṭanga an hmuh tur Rs 10,00,000 bik chu an hmu kim a; General Ward fund aṭanga an hmuh tur Rs 20,00,000 aṭangin Rs 5,00,000 chiah an hmu a, Rs 15,00,000 an hmu lo.

AMC Board of Councillor-in kum 2023-24 budget an pawm tawhah councillor-te ward fund atan Rs 40,00,000 ruahman a ni a, Property Tax return aṭangin Rs 15,00,000 leh General Ward fund aṭangin Rs 25,00,000 dah a ni.

Hetih lai hian, kum 2023-24 atana ward fund ruahman Rs 40,00,000-ah hian nikum 2022-23 chhunga an hmuh tâk loh Rs 15,00,000 chu telh a ni a; kum 2023-24 chhung atana AMC councillor-te ward fund ruahman thar bik chu Rs 25,00,000 niin, nikum aiin a tlem zawk a ni.