PYD Blood Donation Week khâr

UPC (North East India) ṭhalai pawl, PYD, Aizawl City Coordination-in September 8, 2020 aṭanga Blood Donation Week an hmanah nimin khan thisen an pe chhunzawm leh a, nimin tlai khan an khar nghal. Week chhung hian mi 313-in thisen an pe.

Nimin bikah chuan Aizawla UPC (NEI) pastor bial palia PYD member-te'n Aizawl Civil Hospital blood bank tan thisen unit 102 an pe a, a petute chu mipa 88 leh hmeichhia 14 an ni. 

PYD Social Work Day (October 2) puala Blood Donation Week buatsaihah hian Aizawl khawpui chhunga pastor bial 17-a PYD member-te'n ni li chhungin UPC (NEI) General Hqrs office building-ah thisen unit 313 an pe a, petute chu mipa 266 leh hmeichhia 47 an ni. 

Nimin tlai khan Week khârna inkhawm tawi an buatsaih a, UPC (NEI) general superitendent Rev. Lalmalsawma Sailo-in a hmanpui. Week chhunga thisen pe tam ber Mualpui bial PYD hnenah lawmman hlan a ni.