KHAWTHLIR

Harsatna sawiho

Chief minister Zoramthanga hoin nimin khan CMO conference hall-ah Vairengte leh Sairang inkara national highway zauh tura ram lâk (land acquisition) chungchanga harsatna sutkian dan tur sawiho a ni. Adviser to CM C Lalramzauva, EFCC principal secretary RK Singh, PWD secretary K Lalthawmmawia, Kolasib district-a sorkar hotute leh Competent Authority for Land Acquisition aiawh, Kolasib district-a kawngpuiin a paltlang tura ram neitu aiawh te, tlawmngai pawl leh khawtlang hruaitute an tel.

Tanpuina vailiam

ZPM kaltlanga mi eng emaw zatin Manipur aṭanga himna zawnga Mizorama lutte chhawmdawlna tur an thawh khawmte chu nimin zing khan ZPM treasurer C Lalṭanpuia'n Vanapa Hall kawt aṭangin a vailiam. Chhawmdawlna an pek tur hi Rs 12,965 bakah, bungbel ip hnih leh thawmhnaw ip 180 a ni a, hmun 10-ah an pe dawn a ni.

Lawmpuina hlan

Lunglei High Powered Committee vice chairman Lawmawma Tochhawng, MLA chuan nimin khan HPC conference hall-ah Mizoram University-in under graduate result a tihchhuah tâka subject hrang hranga top 10-a lang zirlai 31, JEE entrance test-a tribal zinga pakhatna Lalmuanawmi leh AIFF Footballer of the Year Lallianzuala Chhangte te hnenah lawmpuina a hlan. Lawmawma Tochhawng hian lawmpuina atan pawisa leh thuchei a hlan a ni.

Venhimna sawiho

Hnahthial district election officer R Lalremsanga, bawrhsap kaihhruaiin nimin khan DC conference hall-ah kumin MLA inthlanpui awm tura venhimna kalpui dan tur sawiho a ni. Hnahthial district-ah MLA bial pakhat - South Tuipui chiah a awm a, polling station 27 a awm. Polling station zingah venhim ngai zual bik, Vulnerablility Mapping and Identification of Critical Polling Station a awm lo tih tarlan a ni.